買地圖

今日去左旺角朗豪坊，原本想去買 D 野，不過 D 聖誕歌不停咁播，周圍 D 人又攬到一舊一舊咁影相，對於分左手冇耐的我黎講，好難頂。
企左一陣，FEEL 到 D 眼淚想湧出黎，鼻頭酸酸的，很討厭! 睇野愈來愈矇......我死忍死忍死忍。
我呆左，睇野冇哂焦點咁企左一陣，個心好實好乸，我冇諗過原來我會咁唔開心，有 D 擔心自己其實原來頂唔到，一路扮野死頂，頂頂下頂爆自己。
咁多個月，我未喊過，但其實我知，我好想大大聲聲咁喪喊。

我決定咩都唔行唔買，走人。
(地下大堂扶手電梯位) 忽然有一個男同胞走近我問:『小姐，邊到有地圖?』
『咩野地圖，邊度地圖，邊度有地圖買定睇定畫定玩定咩 Q 野!!妖你!你想問乜野啫!!!! 死男人臭男人!!!』 ( 我心諗 )
『詢問處有得攞。』(指向詢問處)
男同胞:『點去買?』
『咁你可以行後少少，雙手插袋，再一野坐跑衝過去 H&M，白線前自我旋轉，鐵餅式擲個10蚊去詢問處，再蓮花碎步行返去----------買。』 (都係心諗)
『唔洗買，唔洗錢架，我幫你攞啦。』
男同胞:『唔係呀小姐，我想買地圖。』
『咁去書店啦。呢到應該冇喎。』
男同胞:『書店冇地圖架。我想買地圖俾我個女，佢讀大學。』
『地圖袋呀?』
男同胞:『我想買錶。』

.
.
.
.
.
.
.

原來係帝舵錶。