筆婷寫

我的工作

2011-05-25T13:43:00.000+08:00

給我的好朋友

2011-04-13T10:40:00.000+08:00

給我的好朋友:

再難過的時間都已捱過去了，再難下的決定都已做到了。
我相信，我認同，分手要狠，離開要快。
不要怕失去，不要怕孤獨。
因為，他其實一早已捨你而去，你其實很早已失去了他，這的的確確不是今天的事。
哭過鬧過絕望過，遍體鱗傷的你把血淚都流乾過。
認錯認罪承諾過，重覆犯錯的他對你的哭哭啼啼只有表示無可奈何。

我說，孤獨並不可怕，只是這一刻你不習慣。
你大可舒服地躺在床上，SMS一二三四五六個他，暢快地和他他他來個挑逗調情，娛人又娛己。
可不願再躲於剛和他激烈纏綿的被窩內，偷偷摸摸地查看他和她她她的曖昧SMS。
聽到他由浴室走回來了，還要快手快腳把所有東西還原，摟著他還要裝作若無其事，情深款款地回他一吻。

心中反問這是一個給他鼓勵繼續和別的女人去曖昧偷情的一吻，
抑或是獎勵自己的EQ和容忍度又再一次提升...

要求

2011-03-25T00:21:00.000+08:00

今天看了一篇文章，我來來回回地把這個唸了很多很多遍......

如果我們會走在一起，證明我們是相愛的。
我的要求不是很高，去逛街的時候，你會拉著我的手。
看到熟人，能夠和對方介紹:這是我女朋友。

我在想，我對我男朋友的要求又是什麼呢?

開工大吉

2011-03-01T23:40:00.000+08:00

各位觀眾，我返新工喇!

今日就係3月既第1日，都係我同賭場講拜拜既日子! 請各位朋友出黎玩時，唔好再問我係唔係做荷，係唔係好好搵，係唔係識派牌.........
更加唔好再意圖叫我即場畫張賭台出黎俾你地玩骰仔，賠率呢D... 是旦作啦你地^0^

好喇，希望呢份工帶俾我新既希望丫~

謊話情話

2011-02-28T23:21:00.000+08:00

男的可以多花點時間去說情話嗎?
女的可以不要求男人去說謊話嗎?

女:我有什麼比其他人較特別的嗎?
男:沒有。
女:一定有一點點的吧?!
男:特別笨。

我認為所有女朋友都一定會問這個問題，大概我們都以為我們是獨有的，世上唯一的女人。
多麼想聽到男人說我們比其他人好，其實想聽到的是--比以前的那個她好。

女:我生氣了。你哄我吧。
男:親愛的，你很美啊。

女朋友開宗明義指出已經很生氣，男的卻束手無策，(其實是愛理不理，理得你死。)更可恨是那張尖酸刻薄的咀......
愛得激烈時，女的會開口笑。
無情心淡，時無論男女，都只有一句屌。

有時候，
綿綿情話聽得如癡如醉，但卻怕明日一早起來，看到他正和女朋友/又或前度在談一通電話，好夢粉碎，那原本已經傷痕滿佈的身軀立即如被毒打得肢離破碎。

情話? 謊話? 你可有什麼看法?

理性的說兩者皆是廢話。
可是有人卻說，那怕這是沒有意思的廢話，總好過相對無言，對方不肯開口說半句說話。

淑女生病

2011-02-16T20:17:00.000+08:00

我是淑女，在任何地方，無時無刻都要保持儀態及氣質。

今天，我可辛苦了。

華麗地發燒.....

性感地乾咳.....

婀娜多姿地嘔吐.....

最後我那圓渾的屁股被狠狠地捅了一針。

Romantic lonely day

2011-02-14T08:53:00.000+08:00

Happy valentine's day,everyone.

I wish I can spend an hour with my dear darling on this special day.
Where is mr. Darling?
Can someone say "i love u" then give me small chocolate n little gift with French kiss?

PS. Thanks W 's pretty handbag.I love it.

幸福的初三初四

2011-02-08T16:11:00.000+08:00

初三衫四這兩天，我過得很精彩!
已經工作了20小時的我，拖著累到不行的身驅，還要在碼頭被擁擠的人群搞得連站也東歪西擺的，絕對是體能+ EQ 的大挑戰!
早上到碼頭卻是賣著下午三點多的票，還要是長長的人龍不見尾的，發什麼神經? 香港有錢派嗎??
排隊花了很長的時間，還要走去後補那邊跟同胞們搶位置，很辛苦!
慶幸我沒有說粗話，我是堅持正月不哭不說粗話的，總之要有個開心的開始啦。

到香港了，可以見到想見的人，家人呀朋友呀，知道他們都很安好，心中很安慰。
可以見到自己想見的人，真是幸福。

我愛所有在初三初四和我曾見面的每一個人。
希望大家今年勝舊年，笑口常開過肥年丫!

兔年大吉

2011-02-03T01:14:00.000+08:00

好大聲呀!澳門人真係好正呀，可以無啦啦就燒炮丈呀!!!
出面真係丙拎板冷，好大聲好有氣氛呀!

開工大吉
笑口常開
身體健康
步步高陞
財源滾滾來

今年大年初一&初二都要返工，仲一定係會好忙添，希望聽日好好好好好好多人俾好好好好好好好多利是俾我，仲要封封都係金牛!!!
呢兩日同我一齊返工既所有客人/同事都一團和氣，咁我就唔洗勞氣啦。

好希望下一年可以有人真係同我手拖手去行花市呀...
已經係 N 年無行維園喇，好想好開心咁同人迫下迫下，迫5分鐘都好丫...

好希望呢個正月會有好多朋友黎澳門，搵我就最好喇，咁就可以同我一齊去睇/玩煙花喇!
我岩岩黎左呢到一年喇，真係黎左咁耐，放煙花一定係喜慶節日，我次次都要返工既，睇唔到我最鐘意睇既煙花...
真係可唔可以會有人咁岩黎澳門，又會肯同我睇煙花呀? 唔好只係記得黎食自助山/ 餵老虎/ 去大三巴/ 睇熊貓/ 啦...

時間過得好快呀，上年真係經歷得太多喇，今年想穩穩定定，開開心心咁過每一日!
我希望我可以真真正正咁日日笑口常開，事事順利，最好愛情路上有驚喜!

丫....
呢個2月，又係新正頭又係情人月，我呢...想要個新正情人囉!
有無人可以 email 果d 催旺桃花方法俾我呀?

好啦!
聽日返工返去圍住支大桃花，怒跑10個圈先~ !!!! 今年一定會抄多人鐘意，一定抄掂呀!yeah!

昨天今天

2011-01-31T23:47:00.000+08:00

昨天，我感到很幸福，很溫暖。
很珍惜回到香港可以和朋友一起相聚的時間，白痴的對話，傻傻的大笑，十分幸福。
明明是冷得要死，明明是累得頭都痛了，還是不想去睡，大家說說笑笑，十分快樂。

已經很久沒見面了，知道嗎?
又是新年，又是年尾，大家忙著和家人吃團年飯，又要忙著照顧男/女朋友，不就上班直至通宵達旦，很難騰空聚會了。
慶幸那天我無聊一問，竟然臨時找到一個時間出來，大家可以見見面了。
大概沒有計劃的事情，即使結果不似預期，一切都會傾向於接受，更容易得到滿足。
一起渡過那十幾個小時的時間，我很快樂很滿足，謝謝。

今天，看到月曆上的一個圈圈，心中有很多個問號，三個月前的那一天，到底是什麼特別日子嗎?
我呆著﹑站著﹑想了又想......
發什麼神經? 為什麼花時間在這個月曆上的.....那三個月前的圈圈上呢?
升降機內人來人往，在這小小空間內我又開始想起那個圈圈...
就當升降機到達地下，開門的那一剎，答案如風一樣吹進了我腦海--『是某人的生日。』

我不記得我為什麼知道某人的生日日期了，事實上，我拒絕回想任何令我心煩的事，可是，越是不想，越是去想....。
這個圈圈意味著這是一個很特別的日子，這是一個很特別的人......

我走得很慢，大概所有能量已集中來思考那個圈圈去了。『你比我趕時間，你先走吧。』我不想因我無止境的猜想連累同行朋友遲到。
朋友走了，我走得愈來愈慢，最後更停住了腳步，真的走不下去，視線因淚水泛濫而變得模糊......
我不想向前走，只想向後退，退回我看到那個圈圈的時間，好讓我可以把它拿下來。

閉起雙眼我最掛念誰眼睛張開身邊竟是誰
感激車站裡尚有月台曾讓我們滿足到落淚
擁不擁有也會記住誰快不快樂有天總過去
愛若為了永不失去誰勉強娛樂過誰
愛若難以放進手裡何不將這雙手放進心裡

昨天有多快樂有什麼用? 快樂不快樂，快樂後不再快樂，就在最後的一秒，抱了吻了哭了。
和誰人一起抱緊睡到天明又值得甜蜜一笑嗎? 都不肯定什麼是真正想要的吧。
天亮了，睜開眼，又是會看到什麼啊? 又可以擁有什麼啊?

藍色的月台，今天格外深沉，長長的扶手電梯，我走過了一條又一條，可以快點讓我躲進車箱去嗎?
眼淚是為了昨天的滿足或是今天的心淡而流下來?
什麼日子都好，有多特別的意思都好，要我再傷心再難過都好，有誰可以替我把圈圈拿下來嗎?

年尾流流

2011-01-26T23:45:00.000+08:00

抄黑仔...
係幾個月之後我打爛左個花樽，今朝起身竟然踩到果D玻璃碎，...
而家行路仲隱隱作痛!唔該你俾 D 好運我丫。

公司好多人病喎，個個又咳又發燒，充分睇到呢個流感真係好堅呀!
唔該唔好傳染我，真係唔好又又又又又又又又又又又係我!
我最憎就係又病又痛咁過年，真真正正病足 2 年咩!?..........我啋!

冇時間喇, 今日年23喇~!
放工一返到屋企即掃地洗地，洗左 TOILET 同 KITCHEN 咋...
仲有 2 間房 2 個廳未執丫...已經好累，我今晚唔記得食野, 好肚餓呀!好想食 Kinder 繽紛樂呀!

年尾流流，年年都係咁，抄忙呀!!!

演唱會

2011-01-25T00:50:00.000+08:00

王菲2011香港演唱會
抄想去....

父母之命

2011-01-18T01:23:00.000+08:00

救命，我媽子要我同人相體.....

個人簡介:
對象是一個40幾歲的男人，性格唔知，學歷，經歷唔洗知，興趣長相更加係無人會想知......
直到呢一刻，我只是知道已被安排見面，及有人形容那個他:佢真係幾有錢架。

完。

我也不想這麼樣

2011-01-11T01:56:00.000+08:00

我想有新的開始，全新的，可以嗎?
極討厭徘徊在愛與痛的邊緣，極厭倦跌撞於得與失之間，似斷難斷，要辨難辨，很煩人，是折磨。

不知道事情將會變成怎樣，結果又將會是誰人所想，惟有我學會了勇敢堅強，我的生活我自有主張。
當下要做決定的是我，下決定難但我慶幸我可依我心中所想，再不是沒有後路可以退的我黯然獨自離場。

2010年的日記簿自10月起，我不曾打開過，不想寫下任何字句，連標點都不想畫上去。
不想面對自己做錯了的事，不想處理糊塗至極的關係，不想思考不想計較，....... 我很迷糊。
曾經千千萬萬句 : 活在當下，享受人生，難得糊塗....... 排山倒海地湧進我的腦海，我的血液，我的每一個呼吸，自我陶醉。

2011年的日記簿我不想打開，開始寫下一些什麼記錄呢?
要麼憤世嫉俗，要麼自怨自艾，要寫要記的可不可以是有意義，至少積極一點的事?
我努力，我真的要開始好好努力，不要浪費時間，浪費生命，更不要浪費在不值得我去愛去保護去堅持的人，事情或關係上。

我定下了目標時間，我知我可以做得到。
當初的我是為了什麼出走他方? 我還記得。
如今沒有什麼事情算得上什麼，大不了再來個惡性循環，今次我可會再離開遠一點，時間再長一點吧.........

我也不想這麼樣，反反覆覆...
我也不想這麼樣，起起伏伏...

頂

2011-01-08T20:51:00.001+08:00

我會把所有電話號碼都改去。

幾經辛苦下了的決定，全部統統都不要，新的一年，一定要有新的開始。
怎料..... 排隊等了一千年之後，電話公司要關門了。
痴鬼線。

給昨天生日的你

2011-01-08T20:48:00.000+08:00

親愛的:

生日快樂!

婷

除夕大倒數

2010-12-30T22:33:00.000+08:00

個個都叫我去除夕倒數活動呀 PARTY呀大食會呀......，其實會做 D 咩呀?
不過做咩都好........好想 2011 快 D 到，我想變，我想有好的改變。 2011，靠你喇!!

我都想同我鐘意既人一齊倒數呀...

10-> 9-> 8-> 7-> 6-> 5-> 4-> 3-> 2-> 1 ---------> 啜啜...

小心留意

2010-12-29T00:33:00.000+08:00

我聽講，好多野都睇到身邊既人係唔係真正鐘意你，係唔係真心同你做朋友....

如果你有野唔開心，佢會唔知咩事都好，佢都會跟住唔開心，不過之後會主動了解下，再之後會設法安慰你，仲會想幫你解決難題，無論係咪能力範圍內的事，都想幫你。

如果有人知你唔開心，什至係佢整到你唔開心，不過如果佢唔係真心對你，真心同你做朋友，就算你講哂成件事出黎，佢都懶得理你。

只要小心留意一下，就會知道，身邊既人有幾愛﹑幾關心自己。
咁死喇，我琴日好明顯咁表示唔開心。點知有人真係乜都唔理......................

冬至 X'mas 2010

2010-12-24T01:24:00.001+08:00

今年冬至，唔係返工唔係出街，不過唔可以同屋企人一齊食飯，感覺好怪好怪。

Merry X'mas, Everyone.
Thanks for every all of your party invitations.
I am happpi enough to get to know you all still like spending time with me in this happi season.
I love you all.

生活無驚喜

2010-12-08T17:14:00.000+08:00

我想寫點開心的事..... 但寫不出來。
生活只有壓力和煩惱，即使有開心有歡樂，都不可以無限延長....

十二月了，聖誕節了..... 或者，我應該買份禮物送給自己，讓自己開心一下。
買些什麼好呢?

Camera:
Panasonic LX 5 VS Canon S95

Notebook:
Fujitsu VS Lenovo

吞淚

2010-11-26T20:42:00.000+08:00

好好的一個週末，為什麼我卻很想很想哭?
是的，很想很想。
我不知道我該為什麼而哭，大概要哭的事實在太多，不想叫自己記得起。
我努力地按捺，一下一下地把淚水吞回去。我發現，吞淚是一件非常辛苦的事。

如果有人問: 閉起雙眼你最掛念誰 ? 當你孤單你會想起誰 ?
到底... 是誰啊?

誠意是可以裝出來的。愛卻是很難裝。
很想告訴你，我還是很愛你。

愛情.... 是這樣的嗎?

2010-11-26T12:33:00.000+08:00

女人總是喜歡自欺欺人，相信等待。
面對所謂的浪子，或者不能給我們安全感的男人，我們都慣了騙自己，妄想等待的力量，堅信精誠所至，金石為開的道理。

愛情需要冒險，但如果把那種冒險放在等待上，那就實在捉錯用神，十居其九悲劇收場。

既然有勇氣去等，為何不把那份勇氣拿來愛一場，結果就算天意弄人，也總算曾經快樂，總比那種等待中的自虐更有意義。

愛情.... 是這樣的嗎? 是等待嗎?
勇氣拿來愛，不是用來等。何況，你可肯定的知道，你其實在等待什麼嗎?

新好舊好 ?

2010-11-24T03:02:00.000+08:00

舊的，有經歷有回憶。
新的，令你愛不釋手。

昨天我用的香水 :

大大小小，已用了 9 支。

是這品牌的第一代，一直用一直用，沒什麼很特別的，只是和它一起很安穩就是。
我知道，和它一起沒驚喜，不過人家好像已標籤了我和它是一對了。
.....還是舊的好吧 ?反正，就沒有不好的。

今天我用的香水 :

不知什麼時候開始，我有了這新寵，大大小小，都用了 6 支。

氣味相當清新可愛，和它一起，相逢恨晚，想多點時間和它待在一起，什麼時候都想起它，很甜蜜很舒服。

大家都說我和新的它一起時，我很快樂很滿足。

新的很好很好，不過，有時候，我還是會想起舊的它。

最近，我發現，舊的它真的和我不太再相襯，不知什麼原因，我和他一起時就會想到其他的。

我想，適合我的是新的那個它。

當下做到決定了，快快親近一下新的它吧，很想完全擁有它，想讓它知道我愛的是它。

可是卻發現，很多地方都找不到它，意大利都停產了。

人總是有權利去貪新厭舊，也有權利貪新懷舊。
重要的是，在盡量不傷害別人的情況下讓自己開心。

習慣失戀

2010-11-20T00:31:00.000+08:00

習慣失戀

不拖手　或者都可堪稱熱戀
一拖手　比咳嗽更短
太快了　我未快樂過已失戀

想不起　被愛是如何溫暖
想不通　未夠資格使你心軟
但也知道心會這麼酸

理所當然我的錯　令你忽然離開
半路留下我　為何這麼快看清楚
落得這結果

＊知我是個　無法討好的人
　相戀一刻　只是我的僥倖
　然而回頭　誠實去自問
　我可討厭到　如此乞你憎
　知我連眼淚　也絕不感人
　只知怎麼考驗　你的操行
　從前為何　纏在你附近＊

你不寂寞　便嫌我笨
難道我未夠好　未懂得熱吻
足夠令你憐憫　勾不起你的興奮
不擔心　自尊心這麼受損
只擔心　我將我看穿
我怕我　以後太習慣了失戀

理所當然我的錯　令你忽然離開
也是我錯麼　為何這麼快看清楚
落得這結果

食豪D啦！

2010-11-19T01:43:00.000+08:00

C: 食咩好？大家樂？美心？

T:食豪D啦！

C: 咁例如呢？

T: 不如....許留山

C: .........................原來許留山係豪過大家樂!

我地2個大笑左半條街，咩事丫，成日笑笑笑! 澳門無許留山囉，返黎都唔俾人去!

愛情不請自來

2010-11-17T03:56:00.000+08:00

多謝朋友 B 的推介，一起去看這個舞台劇，可以說是我的心聲。

(1) 珍惜眼前人，要立即珍惜。
(2) 珍惜，欣賞和接受眼前這個人的優點與缺點，如當下的一刻你還是猶疑了，証明你的愛不夠

，或者很有可能你不是很愛他/她。
(3) 勇敢去愛，不要畏首畏尾，不愛過永不會知道有沒有好結果。
(4) 愛得轟轟烈烈，沒有刻骨銘心的經歷，人生白過了。
(5) 愛是成全，我愛你所以我放手，讓你做你愛做的事，不會監督你﹑命令你『不』又或指責你的這樣那樣。
(6) 愛是現在式，不是過去式更不會是將來式，對過去的人是回憶是感情是習慣，對將來的人，所謂的愛是假裝是強迫是勉強出來的。

這些統統都是我對愛情的基本概念。

本週：11.14(Sun)~11.20(Sat)

運勢： ★★★★
整體：心情愉快，對待事物也顯得非常積極，你的樂觀情緒也感染了周圍的人，工作氣氛佳。
愛情：愛情不請自來，單身者只要主動一些就有機會談一場令人陶醉的戀愛。
注意：休閒娛樂宜注意安全，少玩危險遊戲。

未雨綢繆

2010-11-16T15:57:00.000+08:00

今年聖誕節.......

未雨綢繆
所以我已經開始買2011年的東西了 ~~

我澳門的屋企無聖誕樹，不過都買左喇....

呢兩隸都抄靚，不過香港無得賣....有無人去日本呀....??

我覺得我鐘意收集細細粒野呢個嗜好...係好野，係美德..

雖然我 TA媽子投訴，話我呢D係遺傳.....

係收買佬之女 ( TA 老爸又係乜Q都留.... ) 與及係

收買佬之孫 ( TA 爺爺收野買野留野係去到 PRO 既情度.... )

我專收買:

水晶

水晶球

星星型物件

細細粒擺設 ( 包羅萬有... )

紙袋

船飛

戲飛

米奇老鼠擺設

磁鐵

仲有好多好多...............

有冇同黨...???

我執著。我等你。

2010-11-09T23:27:00.000+08:00

不是每個人你都願意等待，不是所有人都值得你去等待。
一句我等你，包含了很多的,無奈,心酸,苦澀。
或許是愛不到，或許是不能愛，無論怎樣，我等你這個承諾，遠比我愛你更動聽。
看看身邊，有多少人曾經對你說我愛你 ?可有誰會說一句我等你?

誰會願意那樣卑微的等待，不計較任何的回報的等待，
說一句我愛你很容易，可卻沒有多少有人願意會說一句我等你。

也許你面前的這個人，一句我愛你感動了你，但你卻忽略了那個說我等你的人。
只是三個字，前者的愛有激情但膚淺，後者的愛單純又執著。

如果在你身邊有那麼一個人，願意毫不計較的為你付出，默默的等你..........
那麼，請千萬珍惜他會是一直陪你走下去的那個人。
他不會在半途中將你丟棄，因為他懂得珍惜與付出..............

如果正有一個等你的他，好好珍惜能擁有對你這樣癡情的他
即使他早知你們的結果是不好的，他都一直等下去，說明他真的對你太癡心，
你也可以說他傻，但是一切都是為你傻，能等到你，和你永遠在一起才是真正的幸福！

相信和這樣的愛人共渡一生你也會幸福
經常給他傳個短信，他就會興奮不已
好好珍惜等待你的人吧…

愛情在翻天覆地一瞬間誕生

2010-10-22T10:02:00.017+08:00

十一月我為了自己作了一個很詳盡的計劃，不過暫時已經知道的，由於很多很多的外圍因素而行不行去。

很多的，都是突如其來，出乎意料之外，很麻煩啦...........
究竟需要為自己或為某事定下什麼目標大計嗎? 計劃有用嗎?
當然是要合理的那些啦，如嫁劉華或 25歲前 (已主動暗暗地把它更新為 35 歲 )可以嫁出去等等的這些......已經很早不再出現在我的計劃書內了。

十一月一日，將會是我所有一切的計劃的起點。
寫下來，就是要自己好好記得，不要半途而廢，其實認識我的朋友都應該知道，我一是不做，決定做的，就一定做到底。所以，我知我一定做得到。

工作事業上:
一定加倍努力，為我早在上年定下的目標，繼續前進。
家庭相處上:
我決定原諒我的老爸，要多點感恩，少點投訴 ( 不過不包括停止黑面)。
身體健康上:
我會想嘗試為我極偏食的習慣上改善一下，..................如嘗試吃牛肉和喝牛奶。
愛情關係上:
放下愛。
大家如打算向我示愛求婚的，請好好把握機會，否則，你可能已不會再在我的考慮名單上出現。(乘機在10月繼續硬銷一下。)

本來打算托朋友 R 買11月中的票，約朋友 D 去看，不過，上星期得知，朋友 D 因工事 11月不會在香港了。
心情納悶。

Sammi 唱歌好聽呀，呢支都唔錯，鐘意歌詞。
我相信的:
愛情在翻天覆地一瞬間誕生。

『恭喜你，成功通過了試用期。』

2010-10-20T00:45:00.000+08:00

7月19日
今天，很想很想打電話給某人，想說:『恭喜你，成功通過了試用期。』
真的很想。

不過，我不知道，這是否值得某人開心的事。
或許，有人一早準備好離職，所以，還是不說不問不提較好吧。

抄病

2010-10-19T12:17:00.000+08:00

今日抄病，點解今日呢?
病既感覺令人好討厭，真係又愛又恨。
令我想起朋友 J + J 來探我。
令我想起同事 K 和我一起去看公司的無良醫生。
令我想起 R 陪我去看醫生。
令我想起 R 專程來澳門照顧我。
令我很懷念........

我不想去看醫生又不想去吃藥，更不想去休息，
不停地...不停地....翻看照片，想起很多很多........
上次都係抄病，發燒 39.2. 度，但係有好多朋友問候我，照顧我。
我想繼續發燒，繼續可以懷念過去..........................

今早收到 P 的一包粗鹽，叮囑我要早晚一杯，開水看看，『下火』也.....

P 永遠都是對我很好很好，不過..... 我唔想飲。

P.S. 我愛你。

go to sleep!

2010-10-18T02:43:00.000+08:00

J＊說 (上午 02:22):

can u go to sleep
fuck u
always dont sleep

-. ♡ ta @ 等緣份　信緣份♡ .- 說 (上午 02:23):
are u my fd? i cant sleep then u fuck me...!?

J＊說 (上午 02:23):
u go to bed close ur eye
go
then dont think too much
u can sleep

-. ♡ ta @ 等緣份　信緣份♡ .- 說 (上午 02:24):
thank you.. =)

J＊說 (上午 02:24):
go now
no need thx

朋友 J 是空姐，在巴黎當地時間晚上8時，看到在澳門半夜 2:30 還在 ONLINE 的我，向我說的第 2 句說話就是 FUCK U。
多謝你。
我的朋友.... 其實都很愛我。

今天晚上，輾轉反側睡不到，因為有心事，想哭，但是哭不出來。
其實我真的不享受失眠，偏偏身心俱疲的時候就是睡不到。

苦沖開了便淡

2010-10-14T21:59:00.000+08:00

很討厭沒有禮貌的人，更討厭屢勸不改的人。
今次我真係嬲。
今次我真係喊。
唔知係嬲到喊抑或喊到嬲。

我把它記下來，可能這是我心淡的開始。
希望...真的可以....苦沖開了便淡。

一星期內的五個男人

2010-10-13T00:05:00.000+08:00

第一個 – 我最心愛的男人
前文所指的是我老爸，我發現…他一直有事瞞騙我。
很生氣。
但不知道該怎樣報復才好。
我為人真的不怎麼懂得攻心計，明刀明鎗的與敵人來個原子彈大炮機關槍血戰一場就最好，要麼你死，要麼我亡。
但偏偏…… 對於武器這一門我卻一竅不通。
為什麼要騙我? 為什麼要瞞我?我要說多少次你們才明白被騙的感受是多麼的可怕和失望?
為什麼我最愛的人都很喜歡騙我，我傻我白痴我容易上當，很易騙是不是?

第二個 – 我曾愛的男人
多謝前度的的關心。
十月十一日，早上於我家附近的交通意外的確很駭人，傷者送院不治。
收到前度緊張的慰問，起初收到他的信息，心中先是納悶，久久才打開來看個究竟，一看之下，方發現是一個真心的問候，心感內疚，馬上回覆了他。
知道有人正在關心自己，前度，我感謝你。

第三個 – 人家愛的男人
十月十日的晚上，出席朋友S的婚宴後，身心俱疲，可能我年事已高，先是一連15日的工作後，加上香港澳門一來一回的舟車勞頓，再來一個好朋友C的生日卡拉OK派對，好比完成10公里馬拉松比賽。
不過，能與良朋知已見面，無論是分享其人生大事﹑幸運甜蜜的一刻或瘋狂無聊的發呆，都十分值得。
當晚，人人自娛，不亦樂乎。

第四個 – 我不愛的男人
翌日，有人被男友投訴及責怪玩得太過瘋狂，(大概指的是身體接觸=.=) 。
還點名稱讚應該以我為榜樣(沾沾自喜中^0^)，靜靜的拿著酒杯和同性朋友細談人生點滴就好。
大概友人的男朋友瞎了眼，我靜了下來是有原因的。
我自首:
第一:我剛與朋友 K + S + C 玩了個 4 P 的III遊戲，很累。
第二:剛剛與朋友C一起為朋友K 伴舞，很累。(一個以60年代舞步跳80年代歌曲的男人。)
分別是: 劉華 <獨自去偷歡> + 學友 <頭髮亂了> + 黎明<我的親愛> + 城城<個個讚你乖>
累到不行。我可以不靜靜坐下來嗎?

第五個 – 我想愛的男人
很想很想，真的很想，我想我愛的男人會來投訴啊!
忽然發現，被投訴，被怪責，被罵，都是一種福氣，是被愛的，是幸福的。
朋友呀，你要珍惜呀。
我愛的男人呀，你出現吧，來責怪我一下，好嗎?

背叛

2010-10-11T19:15:00.002+08:00

我想 .....我會.....很快....

背叛我心愛的男人。

因為... 我害怕，
真的很害怕...看到﹑聽到﹑知道... 他一直在瞞騙我。

當彼此間沒有愛

2010-10-07T23:39:00.000+08:00

你好野!
前度今日一句說話，我喊左出黎...!
從來有求於人就要低聲下氣..... 不過，你真係好無情囉。
我真係有需要，真係有用，OK 我會記得你今日講既野，我唔會再求你!!
當彼此間沒有愛，關係可以如此冷淡絕情。討厭呀!!!

『等等等...等!!』『小姐俾反治!』

2010-10-06T22:06:00.000+08:00

黃金週期間，我相信從事娛樂事業既朋友都已經係忙到癲左。我都不例外。
無得放假，連踩一百數十晚.... 踩到爆瘡生雞眼!!

日日個個鐘頭我去派錢派獎，呢個世界真係好多有錢人，五十蚊一百蚊五佰蚊一千蚊........
一樣飛落地加多一句粗口表示對本部門之感謝。根本，佢地懶得行上兩層去帳房攞錢。
噢...... 可唔可以換完錢先飛落地呢?
我一定會飛身訓地去執，並不是貪心，只是為免影響市容及要保持本娛樂場之環境清潔也。

派派下，聽到有台大叫『等等等...等!!』!
係12個大陸男人一齊叫!
(OH MY GOD，我一路打一路笑呀而家)
我八卦行去睇下等咩啦，原來佢地玩百家樂，一齊叫『頂』!
仲要呢...呵呵呵死喇笑死我喇!
佢地係一齊用個右手手踭勁鋤張台!超團結超齊呀!

同一個賭區係同一個旅行團，可能我今日著靚左+有心機化妝，個個以為我好高級。
我已經一路俾人問野不過我唔明佢問咩，個個拎張會員卡出黎俾我:『小姐俾反治!』
我終於停低問返佢:『要咩反治呀?!』
『俾黎啦!俾反治!』
我諗佢以為我係餐飲部:『係咪蛋治呀?!』

『俾反治!』我諗咩野黎架?咩野三文治係叫反治架?
個荷官望望我，再俾我GOOD手勢，同事 O 以為我俾人圍行過黎救我。
之後我笑到死左，估唔估到佢地講咩?
『俾房住呀!』笑死我喇!

如果可以看煙花

2010-10-01T18:22:00.001+08:00

今天，黃金週的開始，早在日星期前已忙得不可開交，勞力腦力已進入透支階段....，對，只是剛開始呢，誇張程度遠遠超出心中所想。

我抄愛看煙花，但自4歲起 (據不可靠之 ta 老爸所說 =.=)，從未近距離看過，我很想去看，很想去聞那火藥味 ......
真的很想很想。
一心以為在澳門可以看個天昏地暗，不料結果依然，一次都沒有機會看到。
11 是要趕回香港出席朋友 G 的婚宴，
18 已回港和家人吃中秋飯
22 又是來個回家，因 ta 老爸『 mark哥上身』般在家大發雷霆
25 聽說法國隊的煙花最大最紅最美 ----- 烈豔紅唇。不過又是為了工作，無暇溜走出去看一下。
霎眼今晚已是最後的一場，又是一樣的工作一樣的忙碌....
其實是更多的工作，更多的忙碌才對，不過，我依然奢望我可以有時間去看一眼，一眼就好。

如果啊....
如果今天晚上天氣良好，風高氣爽，
可以依偎在他的懷內，
一起抬頭看煙花，
一起去嗅那又刺激又浪漫的火藥味，
偶爾喝兩口紅酒，
偶爾來拍照留念，
偶爾來個情深擁吻.........
偶爾....
偶爾.....
偶爾........

如果啦....
如果可以看煙花，那有多好多甜呢......

好的壞的

2010-09-21T00:03:00.000+08:00

我會好快返黎喇。
我會 update 返好多最近發生o係我身上既事。

我要我自己全部都記得，
好的壞的，全部都是我獨有的回憶。

拜拜

2010-08-31T01:33:00.000+08:00

希望 8 月快 d 快 d 過左去....
唔開心既野多到寫唔哂，都唔想寫出黎，我想佢地永遠消失天與地。
拜拜，衰運。
明天，9 月1日，我的生日，重生之日。
之後.......
一定會好開心好開心好開心~!!

不要哭

2010-08-18T05:07:00.000+08:00

上星期的本週運程是假的，食屎的。以後都不會看它，全都不準呢。

八月中發生了一件又開心又傷心的事，短短的五天，忘不了。
我勇敢我膽怯我不忿。
學會了很多，同時明白了很多，這個世界無童話。

工作﹑家庭﹑身體﹑愛情﹑統統出現了嚴重問題，身心俱疲，我.........開始撐不起來。
一向習慣把所有問題﹑難關﹑壓力等的討厭東西，一是自己往肩上扛，一是大口大口地把它們嚥下去，再咬緊牙關一步一步繼續向前走的我，突然軟弱了。

軟弱得連我自己都不認識自己了，一晚，我竟然坐在地上哭起來。( 這是我發現獨居唯一的好處，不怕家人看到，我可肆無忌憚地放聲大哭一場。)
之後，一個短訊來了，本應很高興的我很想看看是誰在這時候來問候我哄哄我。
大概七月關係，滿街都是鬼，擾亂了磁場電波，畫面屏幕看不到任何東西!!!!
處理方法很簡單，結果是那該死的手機被我連連6次重開再加上4次飛跌地上。
憤怒!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
請不要在我軟弱無助的時候圍剿我好嗎??????????????????
我哭得更厲害!!!!
請教我應該怎麼辦? 該如何處理排山倒海的煩事。起碼，請告訴我，怎樣可以不哭 ?!

有趣地發現，原來世界上有一隻豬是很喜歡朝朝聽雞啼的!!!!
一隻特別的豬，哈哈。

好運返黎啦

2010-08-09T00:01:00.001+08:00

今日陽光普照，心情極佳，所有行程地點全都去過無數次，花草樹木沒有太大的改變。
然而，今天在我身邊陪伴我一起共度時間的幾個人，就是一個全新的組合，非常特別。
有幸跟隨一位朋友的身邊，體驗一個很特別的工作生活，發現不輪男女，認真工作時候的樣子，很有魅力。

整天穿背心的我，多了一個背心黑印。 X.X

本週：08.08(Sun)~08.14(Sat)

運勢： ★★★★

整體：心情愉悅的一週，投資者因獲利而內心暢快；上班族也因得到賞識而信心十足。

愛情：有許多機會與異性朋友談天說地，單身朋友有機會戀愛；有伴侶的人小心另一半吃醋唷！

注意：偶爾請請客，與朋友保持聯絡。

可不可以不要再在我心情不好的時侯跳

2010-08-07T12:16:00.000+08:00

心情不佳，不停清潔 : 洗碗洗衣洗地再洗碗。
病態。控制不了。

直至凌晨 4時，跳 fuse。
好黑，好怕，白痴的我是怕黑的。
打開那個什麼什麼箱，嘗試把那堆什麼什麼掣拍上拍下拍個不停，結果失敗。
拿著那個該死的手提電話又時好時壞，時有光時無光，發生什麼事了?
有鬼吧。

我哭了，眼淚不知道是為什麼而流下，大概就是在背後作弄我的那隻衰鬼。

忽然覺得好累好累，馬上跑回房間。
發光體就只有我親愛的手提電腦﹑那個該死的手提電話和那個發出藍色光的空氣清新波波。
輾轉反側，失眠了。

三更半夜去呢到果到

2010-07-27T00:43:00.000+08:00

如果有人可以因為我一個胡鬧的 SMS，三更半夜的由香港到澳門來。
這人是傻的嗎? 有沒有這樣的一個人?
你會嗎?
我會很慶幸自己還有幾分魅力，都很感動為我舟車勞頓的那個人，這是浪漫得要死﹑甜得使我窒息的一個行為。
(我沒說此人正正或曾經真實地出現過。)

前男友和我都同住新界區，但無論我暗示明示咆哮叫囂，晚上11時過後，他寧死不出門。
不得不高度讚揚他四年以來的堅持，有請特首頒發紫荊勳章，請站立，升旗吧，奏國歌，禮成。謝謝。

其實我不需要我的男人浪漫如李察基爾又爬梯又唱情歌又咬玫瑰...... (其實真係唔係個個女人都 BUY 囉。)
更不希望過著刺激如做華 DEE 女人，凌晨時份好夢正甜，忽然把我抱起來個烈火戰車，無啦啦又爆破婚紗店.........
( 唔係十八廿二喇，唔再睇YES!你地男人都唔會再梳阿郭富城對你愛不完，中間分畀 m 字髮型啦---- 係 m 唔係 M，果個死吹爛吹的兩個彎位，精髓所在。 )
死，幻想症又發作.....

我想大概只有大肚婆才有這樣的大勢力，可以指令男人三更半夜去這去那...........
那.... 男人的東奔西跑是為了他的女人還是肚內的那個她呢?

一個特別的晚上

2010-07-26T09:17:00.001+08:00

7 月19日
不知是哪裡出了問題，左手突然在無聲無色間出了很多很多的紅點。
如打排球後，爆了很多微絲血管一樣恐怖。
看醫生後，(胡)說我該是對玉鐲和銀鐲起了敏感反應。
發神經，已戴了接近10年，今時今日忽然敏感?
(所謂)醫生:『是的，敏感的時候就會敏感了。』
我當時有多想跳入坦克車，之後一條直路衝過去，狠狠的輾過她.................那個他媽的聽筒和血壓計!!!!!!!!
現在已沒什麼了，不過我還是很想知道究竟是什麼一回事。

下午時間，我說了心中想說的。
不知道對方會有什麼感覺，我不太在乎。
不分對錯好壞，我是直接的人，接受也好，不接受也好，我控制不了。
接受的就要好好聽著，不接受的大可置之不理。
我是一個有話就要說出來的人。

晚上，又驚又喜的過了一個晚上。
是如此的難忘，是如此的喜出望外，是一個只屬於我們的快樂時間。
我會好好記住。

朋友間的相處真的是奧妙，有時候，我愛和朋友一起白白痴痴無所事事是是旦旦地過一天，多於回家後看見我愛的老爸老媽之後帶來的壓力。

p.s. 蕩羊羊開始發功了! 我要急起直追呀!!!!

7 月中發生的幾件事

2010-07-23T03:02:00.000+08:00

好多日冇寫blog喇，太攰。返工對住電腦既時間長得雜普，返到屋企真係唔想再對住個notebook，對到想嘔。

7 月過左一大半喇，都發生左唔少事:

No.1 世界盃

四年一度，上屆有EX陪我睇夠我估冠軍，最後意大利真係捧盃，贏左好多錢。

今年大家分開左，都有分享下波經，不過大家想法就大相逕庭，佢撐荷蘭，我撐西班牙。

西班牙贏左，對我既意義好大。呵呵~ 不可不信，我係勁喎。

No.2大翻身
廚房洗手間大變身，呢樣真係要多謝包租婆。
爆渠漏水天花剝落等等等等，一路以來都得過且過，今個月佢心情好，同埋真係好錫我，全部一次過換哂佢。
真係呢…爽死!

No.3 睇醫生
我有D唔想再睇醫生，不過由於我可能或者唔知係唔係太偏食，身子真係唔係太好。
又要$，又要成日帶住D藥出街，好鬼煩。唔食會點先? 會缺乏營養會有病囉，最煩就係無啦啦休克。再一次鳴謝:
朋友W o係尖沙咀同荃灣扶我，唔係有佢，我撞爆頭死左10年。
朋友R o係地鐵入面抱起我出車既同時都仲要幫我執返部跌左O係地既電話。

No.4 燙傷
煮麵煮左20幾年啦，有一日離奇地竟然被燙傷。
剛剛我又著住背心超短褲，我係嚇死多過痛死，好好好好好好好好好好驚會有疤痕囉。
最後係好好彩零疤痕，唔係就一世喇，搵鬼要咩。

No.5 男人按摩
第一次，真係第一次俾個男人按摩，按身。
係我完全唔知情既情況下，女人變男人，我知道既時候，好想打巴佢，好似俾人非禮左成個鐘咁。

NO.6 前度
同ex 既關係好似好疏離，大家暫時唔見面係一個正確既決定。
有時候大家會在網上討論一D好私人好深入既事情，坦白講，聽完真係會呷醋會妒忌會不忿，我估呢D都係正常反應，始終我係女人一個。
其間同佢食過幾次飯，有一次係我最難忘既，一齊坐一齊食野，佢都係好似以前咁幫我諗我會鐘意食咩，又夾呢樣果樣俾我，仲好記得我食野既習慣。

我個心依然係好關心佢，可能我真係一個好善良既人卦，我會希望佢工作順利，生活愉快，同新女朋友既關係認真長久。不過，呢一種善良換來的會是一種對自己好慘痛精神折磨。

點都好，我都希望佢地一齊會快樂。

No.7 友人結婚

又有人結婚，紅色炸彈一個接一個。

身邊最好既男人朋友S 終於修成正果，決定成家立室，以後真係辛苦哂 P嫂，照顧呢個….哎，唔知用咩黎形容佢喇真係。

好姊妹C都結婚喇，去去下法國旅行，佢男人無啦啦好似拍戲咁同佢求婚，SWEET到暈喇。

妹妹A年尾就結婚，時間緊迫，睇住佢忟憎，睇住佢瘦，睇住佢為呢樣果樣野煩，人都癲。

結婚，其實係為咩野?

婚禮，又係為咩要搞?

咁我都咁上下啦，中女架喇，仲坐o係到得乜呢又..........!?

No.8 抑鬱

有一個星期，抄抑鬱。

屋企人俾我既壓力使我呼吸唔到，公司多野做到我負荷唔到，感情生活過度寂寞同過度充實我又接受唔到，食慾下降+失眠更令我連脾氣都控制唔到。

我抄憎呢d感覺，我個人其實真係好簡單，我想人人都係好人，日日都過得簡單開心。

分分秒秒既抱怨呀﹑投訴呀﹑納悶呀… 根本每朝早都唔想起身去迎接呢d日子。

不過，已經過去喇。

No.9

朋友L既戀情有異樣，喊到返唔到工，喊到唔想見人，喊到連我返左香港佢都唔肯見我。

我好心疼，好緊張佢唔知捱唔捱到呢一關，知道佢愛呢個男人，不過都知道呢個男人已經開始變心。

點樣先可以令男人鐘意返自己多D? 無人識答。

變了就是變了。

世事無絕對，可能一個小分手，會令佢知道妳曾經對佢幾好，又，會令妳自己知道妳真正需要既係邊種男人。

No.10 羊花會

羊花會既成立…..真係….可喜可賀。

羊花會宗旨係要找尋開心，即使開心包含了思想﹑身體﹑身份﹑宗教同道德上既不當和背叛。

暫時成員有三: 包括淫羊羊﹑蕩羊羊﹑姣羊羊------------------人丁單薄，暫時無什麼可以分享。

我本人姣羊羊入會以來從未對此會作出任何貢獻。( 請敬禮 ! )

首先，如其名 – 盡量發姣，不過，從未得到其他成員的認同，正在努力學習當中。

淫羊羊﹑蕩羊羊積極籌備了很多 party 和 gathering，睇睇到時係咪真係大家又有新既人生啦。

BALL

2010-07-06T01:44:00.000+08:00

世界ball.......... 哎, 仲睇唔睇好? 頂..........................

金融海嘯後的第一個世界盃.......
某博彩有限公司，已穩賺 4 個億。

窮...真係唔得囉。
人又好，公司又好，國家又好，波又好，一窮就咩都唔係，咩都唔得。

又想睇戲又想睇波

2010-06-25T01:09:00.000+08:00

工:
好辛苦，好多野都我做喇已經，對眼前所未有咁爆紅根。
我出名捱得架，我都攰，真係...真係多野做囉。TRY MY BEST，再盡力啦。
同埋呢，返工可唔可以少D是非 ? 奸人衰人死開啦。月尾咪又係出一份糧 !
係咪真係要做埋 D 乞人憎野啫 ?

戲:
人生如戲。好多套戲都想睇呀。睇介紹已經好有共鳴喇。
暫時返 HK 睇左 SEX AND THE CITY 2，OK的，好睇過第1集，都有 D 啟發。
前度分手說愛你Knight and Day.Salt = 想睇既請舉手。

世界盃
頂。嘔血ed ! 嘔左幾百次 !!!!!!
葡萄牙 = 第1場唔知咩事，0-0，俾多少少力丫。
英格爛 = 廢左 + 輸硬。不過碧咸係靚仔。
法國 = 明顯食左屎，毫無體育精神。
意大利 = 後防咩事 ? 夢遊 ? 仲有，咩事打交啫.........好肉酸! 上屆第一今屆唔洗一定第一既，咁不過可唔可以唔好踢成咁呢?
美國 : NBA +石油夠你玩啦，又差隻腳埋黎!

P.S. 意大利最後有d攻勢架，想力挽架，我欣賞。好過 D 死人法國佬同英國佬。

TO 我力撐果隊:
前車可鑑，你地打好 D 呀唔該!!!! 錫哂你!!

世界盃

2010-06-23T23:49:00.000+08:00

黎左澳門咁耐呢，最最最開心同覺得最最最值得既，
就係晚晚放工都可以睇免費電視直播世界盃。
唔知蘭桂芳/銅鑼灣/灣仔既情況係點呢?

今屆真係冇場好睇，法國英格蘭直頭係又求其又差，呢4年佢地有冇練波架 ?
暫時，我睇好既一隊表現不過不失，希望黎緊再好睇D啦!!!
好難估囉真係，今屆邊隊會捧盃呢????

睇波呀! 又估中呀!

2010-06-16T00:10:00.002+08:00

咁多場波，我場場都估中哂喎。
意大利 1-1 巴拉圭都中，抄勁，抄佩服自己!!!
葡萄牙 0-0 科特迪瓦咁都中，係唔想見到既賽果囉，抄心痛，不過又覺得自己抄好眼光。
心郁郁想買波添...........

巴西 vs 朝鮮
好神秘呀............................
好想好想睇，巴西冇理由唔睇，不過食左藥好攰喇已經，唔知頂唔頂到喇今晚。
哈哈，我估聽日要返工果D男同事，好多都會 SICK LEAVE喇。

我係真係鐘意睇波，唔係只係睇明星架，我知咩係越位架，咁不過 :
碧咸係靚仔，著西裝呀....殺死人。
卡卡係有形有料啦，傳球係好野喎。
美斯又快又勁又得人鐘意，CUTE囉。
托迪真係完美王子，完美完美完美。
C.朗我唔太鐘意，死好命啦，係真係靚仔，獨食﹑插花﹑插水又如何，都係犀利既。

不過，唔知點解，我覺得以前D波好睇D囉...
馬甸尼
施丹
簡東拿
奇連士文
巴治奧
巴迪斯圖達
呢 D 先係踢波囉，真係唔訓都睇架，(果時後生掛....)定係以前講波果班人勁 D 講波講得好 D 呢?

全身好攰，膊頭好痛，好疲勞呀。
我知一個人去拱北係有D危險，不過真係頂唔到喇，聽日放工又係收 8 點，無辦法，一個人拿拿林去揼一揼骨先，早去早回啦。
我想揼 2 個鐘膊頭 + 2個鐘 BODY，1 個鐘牛奶 SPA。
呀...........我聽日都唔想返工呀。

又黎.............

2010-06-15T01:42:00.000+08:00

來了這個地方 4 個多月, 今日，第 6 次病倒。
又燒。
又發燒。
係又又又又又又又又發燒!!!
燒夠未呀? 燒銀紙睇醫生! 好煩呀!

咁我點睇波呀!!! 頂!!!!

變

2010-06-09T23:56:00.000+08:00

好喇。要成熟，要醒目。

傷

2010-06-08T02:20:00.000+08:00

多謝你你你你你既支持，感動。我知，我要放低。

然後我有我生活，然後你再愛別人。

傷得很重卻未曾絕氣。

Damn it, i am the loser.

2010-06-05T03:31:00.000+08:00

I know i shouldnt care but i fail.
Its not that I am still into him, no i am not.
I feel bad coz i never think a man whom i ve been four yrs could have done n talked all this to me.
Okay i understood there is no love then i am juz nobody.
However, would you respect and be polite to me, as a friend?

He changed a lot. he had done sthg i guess even he himself never think he would do.
okay, i dont mind. Done is done plus it happened after we split.
Or I would say my love could forgive anything. Love for friendship, relationship n family.
For me, i respect honesty.
If you tell me straight in advanced, i would juz forgive n accept. I know its stupid somehow.
if you lie, then no, you will be eliminated.
I m not quite sure wat kinda love/ caring it is. All i know its 100% true and from the bottom of my heart.

I treat him like a very very close good friend.
Advices are all for his own good. Its not that i m doing it on revenge or for jealousy.
Saying i am a trouble maker, denying how worse it could be, smashing my dignity into pieces, pinpointing me this n that...
It hurts me.

A fd said I should learn to treat me myself better, not that to any others.
Saying I dont need to worry, concern, analyze or help abt their problems/situations coz I am not their angels. Its not my job at all.
Why is everybody telling me not to treat people good?
Don't you see/ think human being is ugly enough today?

I wanna cry. Whose shoulders I can cry on?
I never think I would need to cry under this circumstance.
Damn it, i am the loser.

2010 年的上半部份

2010-06-02T13:01:00.000+08:00

6 月了，2010年已經過了一半有多的時間，回想上年的6月份，可說是悲喜交集。

工作上，找到了一份在博物館的工作，從未接觸過這行業，所有人所有事對我來說都很新鮮，知道了很多博物館內的一些鮮為人知的事，很有得著。
我重申，博物館內的同事個個都是精英，人人都是文化界的人才，做事好不認真。
絕對非一般普羅大眾市民所想: 『日日嘆冷氣等收工。』
悲的是….. 同一時間，我決定結束4 年的感情關係，即使已打算好結婚計劃，都一一作罷。要作出如此的一個決定，對一個16歲的小女孩來說，不是什麼一回事; 但對我這個中女來說，好比同一時間地動山搖，被山崩海嘯地震一一包圍，人生之低潮。

今年的6月，已在澳門生活了幾個月的我，開始了人生新的一頁，我佩服自己的勇氣及果斷(衝動?)。
知道明白面對的會是很多很多: 如工作，人事，生活交際，起居飲食，房租水電煤開支….等等都要自己處理。有千千萬萬個不願意，但學會獨立是必需的。

感情方面依然毫無突破，但信不信由你，口邊常說『我想有個男朋友呀。』，其實，我心中並未為此事焦急過。
不然，多點到處逛逛(留情發姣)，多去朋友聚會(blind date)，夜夜唱K ( 浦吧對酒)，根本不愁寂寞。
不是我對自己充滿自信，只是男人在此等吃快餐情況下，通常都毫不挑剔，嘴巴放得下即成。

一年了，我有改變嗎?

可能我蠢，對別人真心真意，付出不望回報，這個我很堅持。
我繼續相信人生是很多在你身邊的人和你一起創造出來的，關係更是雙向的，想人生美好，先要對自已好，再對別人更好。
工作上，我已有了計劃。目標，我希望我可以做得到。

感情上，我依然傷心。前度，你要愉快，祝你愉快。

親戚朋友們，我不知道你們是否還記得我，我在你的心中又有著什麼的一個位置，可是，你們對我來說，都是一份一份的能量，一個一個有力的支持，無論男的女的，每次每一次，當我見到你們，我都想給你們一個緊緊的擁抱，我很想你們。

上半年的你又過我怎樣? 還記得我嗎? 記得我的什麼事呢?
我希望大家的下半年過得比上半年都要好，要100倍的好 !

IQ 博士 @ 澳門

2010-05-20T14:16:00.000+08:00

我想多謝幾位同事。

由於我好想集齊一套12款既IQ博士造型公仔，我不停周圍叫人地去7-11買野食，攞貼紙。
今次真係唔搵幫手都唔得喇，O係澳門唔係好多間7-11 (相比香港啦。)，我又正在減肥，唔會買咁多零食呀，飲品呀呢D野... 咁... 即係唔可能有好多機會去攞到印花貼紙喇。

同事 K - Tea time 為左幫我，行到去好遠既 7-11，原本諗住買包餅食。
點知見到熟食既『面筋』(打邊爐果D山筋)有著數，買一個就送一個貼紙，即刻買左10個，20蚊成交，TOTAL就有11張喇。
激快鯨吞10個『面筋』。<------------------------------ 超級多謝。

同事 R - 知道我要印花貼紙，佢左摷右摷，摷到褲都爛，摷到3個!!!
雖然有D已經係起哂飛角，但係睇得出係真係為左我而同我摷下啦。好熱心的。
第2日，佢仲特登O係屋企攞多3張俾我，係特登喎! <------------------------ 好好好好感動!

同事 A - 呢個平時唔係同佢好多野講，佢知道我努力尋求貼紙中啦，走埋黎:『你冇邊個呀?』
第2 日，佢特登攞左個『山吹綠子』俾我呀!!!係咪好人先?
老實講，山吹咁靚，多左都唔係一定捨得俾人啦。<------------------------ 我會準時交野俾你架喇。

我既工作時間都好長，見同事多過見屋企人/ 親戚，呢D同事我好珍惜，不過已經唔係中學生，有D已經有男/女朋友，有D又結左婚，有D仲要係大緊肚，冇可能成日約出黎一齊去呢到去果到，個個都有自己既圈子同生活，見面時間99% 係O係公司喇。

呢個係我既工作生活，好幸運暫時我真係返工冇咩壓力，環境都好舒服，忙一齊忙，HEA 一齊HEA，我好珍惜呢個時間，會好好記住呢種感覺。

搵工既時候，好多時都係考慮人工呀福利呀前途呀，無錯，呢D真係好重要，但係，公司既既文化，同事既性格.... 其實都好重要。

唔知會唔會有人試過為左唔想見麻煩同事，或厭惡公司某種文化而辭職不幹呢?

近況良好

2010-05-14T18:04:00.000+08:00

救命….又爛野!!
今朝化妝，塊鏡跌左落地，爛哂啦。
唉….. 銀色既心心鏡呀….都係我心愛之一，仲咩呢幾日我鐘意D野一件一件係咁爛呀?
今日爛鏡，大吉利是囉。

成個5 月，幾個星期六﹑日都唔洗返工呀。
星期五放工搭船返香港，六﹑日就去玩，星期一先返去返工，好PERFECT!
不過………
咁樣一來一回，交通費會好貴喇。我呢個月又失控咁買左好多野，冇錢啦。
香港，我好掛住你呀!

公司既PROMOTION會由6 月份先再開始，6 月既WEEKEND又係要返工架喇。
而家返工都幾忙，我都負責左好多6 -7月份既野，廣告﹑宣傳﹑印刷﹑抽獎﹑司儀….等等。我忙得好開心。
最最最開心係我會負責呢次既錄音帶，我把聲會o係公司播足個幾月，YEAH!
上次冇我份錄….係因為我講野d音唔正囉…. 我今次唔知pass 唔pass到呢?

P.S. 5月11日，我成功過左試用期喇。

買

2010-05-11T23:05:00.000+08:00

我的一條玫瑰金頸鏈，斷了.......! 什麼意思.....!?!?!
我抄鐘意的一條呢.......... 無陰公呀。
嗯............又想買野 tim..........

買左 canon 550D 喇 ~~~
多謝朋友 R 同埋朋友 S，一齊陪我去買野!
真係呢.. 對我黎講，入到呢 D 相機鋪，一舊二舊都係黑色既野，睇黎睇去，都係唔知睇左 D 咩....
有時，男人真係有用既。

下一步，係搵閃石痴靚個相機去，OKOK，下個星期返香港去深水步先，希望唔好咁熱啦，BLING BLING下咁，好華麗咁拎出去影相先 !
BYEBYE, G10。
嗯.....
相機帶，皮的，紅色的，找尋中.............

媽媽妖我

2010-05-07T15:11:00.000+08:00

明天打算回香港，慶祝媽媽節。我愛她。

有一次，我們在談論其他親戚朋友們的兒女，有人事業有成，有人一事無成。
我不喜歡批評人家的所謂『成功』或『失敗』，這是十分複雜的題目。

要知道『成功』非僥倖，必然是千辛萬苦的付出過，如日日刷鞋﹑篤人背脊﹑陰招出盡… 。不過，我知道的，我認識的朋友當中，都有人是默默付出，勞力勤奮而受賞識重用的，不過，只有一二。

誠然，『失敗』必有因，更可以有千千萬萬個，人家說找出原因，對症下藥，可望成功，不過，我不認同。失敗就是失敗，不要再追根究底，找到所謂的原因，事事可以讓你重來嗎? 何不想出新點子，走出新路，再來個新嘗試。

我說:『成功又好，失敗又好，唔洗講唔洗羨慕架，今日成功唔係等於一世都係架。而家一事無成唔等於以後都冇機會做大事架。』

『佢地阿媽成日攞黎講攞黎認叻，我冇唔抵得喎。』

『世事如棋呀。』

『成功有錢又點，行出黎講句野都唔識，不識大體。』

『根本無人想睇，係睇佢d錢啫。』

『仔女都好，唔洗靚唔洗有好多錢架，心地善良，談吐大方，孝順父母，見到親戚朋友識吹下水，唔好縮埋一邊，已經好好。』

此時，周邊的鑼鼓聲奏起，千萬支射燈多角度的照向我，腳下的那塊地磚突然徐徐自轉又緩緩升起。
我立正昂首，挺胸收腹，輕輕拍拍心口:『阿媽，你讚我呀 ?』
ta 媽子怒目斜啤，反眼瞄咀，氣驟丹田，喝吒: 『妖----------------------------------!』

雖然妳不認為我心地善良孝順大方，我都希望妳每天過得開心快樂。
媽媽，我愛妳。

蛋糕

2010-05-05T16:23:00.003+08:00

上個星期回了香港好幾天，是為了慶祝 TA 老爸一年一度的牛一。
買了 2 個生日蛋糕，一個 3 磅，再來一個 5 磅的。那餅店的蛋糕的確好吃，已經是第 3 年 ENCORE 了。

大概我太細心，或是我兩個弟弟都沒良心，20多年來，沒有一年記得爸媽的生日，沒有一次參與籌備或報置的事宜。 --------- 他們只參與吃的部份。
今年，由於我不在香港啦，我一早已打電話吩咐他們忙這忙那的搞好一齊所有，但是，回到香港得到的回覆是 -- 平淡是福。
老老實實，我好久不回家，但那刻真的想打人。

幸好，ta 媽子早已預備，( 唱 ) 上帝早已預備...我不相信運氣.....
一早已到餅店訂好蛋糕各樣了，當日，那兩個討厭的小男孩都剛巧沒有時間 (沒有想過要去)提貨------自取蛋糕!!!
8 磅的蛋糕，要我這個小女人自己扛去酒家嗎?!!!
我對ta 媽子說: 『年年都係我，都唔緊要，年年都 5 磅，好辛苦架知唔知啫，都唔緊要，今年係 2 個，仲要 8 磅，我唔係拎唔到，我唔擔保我拎到去個蛋糕散哂未囉!!!!!』
『你得架啦，你對手廢架!?』
『我拎到去唔散既話，我就一野兩野質落 2 個細佬塊面到!!』
『唔踭在質多野落你老豆塊面到!!!!』

再一次証明我媽真的是100%偏心!!
最後，細細佬良心發現，陪我一起去了。

P.S. 我係唔係阿媽親生架呢??
不過，我很愛她。

忽然之間

2010-04-27T01:08:00.002+08:00

今天心情不好。

逢星期一的早上，我都例必打電話到香港，和老爸&老媽子報平安。
這個4月份，病了1星期，沒有多少天假期，沒有回過香港幾次，心中很很很想念他們。
尤其是惦念 ta 老爸，他上星期生病，不知道現在好了沒有;
都想念 ta 媽子，因為母親節快到，正在和2個弟弟俏俏地設計母親節行程。

換來的是粗聲粗氣:
『老豆呀，我同你講丫，我今個星期會返黎架...咁呢星期五晚呢就...』
『你放假果D同你媽咪講丫....』

電話如手榴炸彈一樣，誰都不願踫，還聽到把電話推來推去的的格格嗄嗄聲。

『媽咪呀，^0^ 我呢個星期返黎同老豆做生日。』
『仲有呢!!!!?』
『哦，我下個星期返黎同你食母親節飯呀! =) 』
『咁點呀?????!』
『即係，話你知我d假批哂，一定返黎。』
『仲有冇其他野呀!??!?!』
『暫時無...』
『哦，好，係咁先! 拜拜!!!』
立即收線。

心中多麼的不好受，但無理由在這個時候和他們理論。
一來正在上班，不可能大叫大嚷。二來長途電話每分鐘收費1元正，不可能一直不停講講講。
我安慰自己: 可能，她擔心我負擔不起長途電話費而極速收線....又極有可能，她怕羞而不善辭令。

內心抄抄抄抄抄抄抄納悶。沒人愛的感覺極難受。
忽然之間，想起『忽然之間』-- 忽然之間，天昏地暗，世界可以忽然什麼都沒有......我想起了你，才想起自己。

晚上，收到 ta 老爸的來電。想要錢。噢，是這樣嗎.....好的。
我會給您。
想起『忽然之間』-- 想你算是安慰還是悲哀。

晚上，電視直播著為了青海地震的籌款節目，又是唱著這支歌--忽然之間。
我眼淺，哭了很多。
救命，一團愁雲慘霧包圍了我。

最近，做了我認為是完全失去理性的事，有點迷失﹑有點墮落。
不過，不後悔，而且，會繼續。大概，如燈蛾撲火的事，一生中必定有一﹑兩件就是了。

默哀

2010-04-21T23:48:00.003+08:00

青海有天災，今天大家為罹難者默哀。
今早 9時30分，全娛樂場一切活動停止一分鐘。
大家整齊站立﹑閉上眼睛﹑籌碼離臺，------------------------------------- 進行默哀。

<< 一分鐘後 >>

庄﹑閒﹑庄﹑閒.....
請投注....
停止投注......
叮叮叮﹑ 5 5 6 ﹑16 點大。

大家繼續搏殺!!!!
可以即刻唔記得邊到係青海，地震會死幾多人，什麼是珍惜眼前人，什麼是熱愛生命等等統統拋諸腦後。

賭 - 究竟有幾好玩 ?

S 太太，
我新工作地點並不是---新---浦---崗---廣---場!! 不是!!!

p.s.咳死我喇.............

賭場　之升降機內

2010-04-21T15:26:00.000+08:00

賭場　之升降機內
７０多歲的老外攬著左一個右一個，面紅眼淫。
' You know what's the most important in my life?'
我對他微笑一下。
' Make Love. '

' You know what you should do in casino?'
我對他微笑一下。
' Make Love.'

' You know what to do after ....... make love? '
我對他微笑一下。
' Make Love.'

' You should try! Make Love then Make Love then Make Love ......'
' Enjoy your time, sir.'　我走出去，升降機門徐徐關上。

我頂佢個肺！！！性騷擾我呀！？
阿伯，你係咪痴左線? 你一晚2 個都已經冇咩可能啦。　仲係到吹吹吹！吹水吹到咁架Ｄ人！
我第一個問題已經想答：
' You know what's the most important in my life?'
' VIAGRA!'
你唔係食左偉哥！？　邊有可能丫你！！！？

賭場內天天都發生很多有趣的事，好想一一寫下來。

大病一場

2010-04-20T14:06:00.000+08:00

星期四 = 發熱
星期五 = 發熱
星期六 = 發熱
星期日 = 發熱
星期一 = 發熱

星期一。病假一天。唉，未過試用期的我，月尾那份糧又會少了點錢。( T.T )
整天在家睡睡睡。睡了又睡，睡醒又睡，睡到天昏地暗。
星期二，退燒了。

^0^ 多謝你替我分藥，倒水。
>.< 會不會是豬流感......... ?

發燒

2010-04-16T22:05:00.000+08:00

下午，撐不下去。
看醫生，先探熱，後打針。
體溫 38.6 度。

發熱，不可以繼續上班。

p.s. 來了這個地方 2 個月，已大病了 3 次。

TGIF

2010-04-16T12:04:00.000+08:00

TGIF!

黎左澳門岩岩 2 個月，病左3次，今日發燒 + 頭痛。
同身酸酸軟軟...唔知係去完跑水塘既後遺症，定係傷風感冒既症狀。

跑水塘，晚上時間 9:35
嬸嬸話唔好去，好夜好危險....... 我就一路行出門口，一路回應:『唔怕架，得架喇。』
阿叔叫我帶埋 2 隻狗去，安全D喎，又可以引到其他放狗的男人的注意。
傻傻地，一黎我仲係驚狗，二黎佢果2隻野叫都叫唔聽，一定係將我拖行到皮開肉爛。
跑水塘時巧遇同事 N ，當時佢正在放狗，雙目無神，一定係太攰。
人地隻金毛好聽話好斯文，乖乖的慢步中，畫面幾咁靚............

我阿叔果 2 隻... 名副其實 -- 癲狗。
諗下我會俾 2 隻癲狗扯行水塘 1周半，到時真係唔慌唔引人注意!!!!!

好頭痛.......。

假人

2010-04-15T00:09:00.001+08:00

周圍都有假人。假人存假心做假事說假話。
公司有個抄假的刷鞋假人，好想一巴星佢，好想。

佩服假人假得出，假得徹底，不過假得沒有技術，假得乞人憎。

對上司對同事，我都係做返我自己，假咩Q野，鐘意就傾多2句，唔岩 KEY 就 HI-BYE。
我信物以類聚，相同性格的人必走在一起，慶幸，我身邊沒有假人朋友，所以，我不是假人。

所以....升職發達無我份。

祝福相機

2010-04-12T14:38:00.000+08:00

上星期去了占卜，問題都是圍繞工作和愛情。
占卜師說: 過了4月，我的什麼星就會很亮，什麼宮就會很好很好。
我:『很好是什麼?』
占卜師:『工作順利，有男朋友。』

OKAY，盛惠220元，嗯..... 220元，就當買到一個祝福啦。

___________________________________________________________

去了電器店，Salesman 叫我買550D，最好配3支鏡。( 3支...一次過買? 無需要卦...? )
否則，買50D，配一支鏡。( 50D，中階喎....)
好明顯...這個可惡的男Salesman在欺負那天真無知的我。

嗯....誠邀男人一個，陪我去買野。薄酬。

你是誰?

2010-04-12T14:04:00.000+08:00

好奇。

請問你是誰?

你一直都在看，我認識你的嗎?

身處非洲左邊的你，可以告訴我那是什麼地方嗎?

信不信由你 II 之接吻可懷孕

2010-04-09T17:25:00.006+08:00

信不信由你 II 之接吻

實驗: 一億對情侶 + 連續接吻超過24小時
發現: 男方精子上腦 + 女方口腔排卵
結果: 懷孕

如果結合失敗，精子上到腦之後會點架呢?
粒卵子係咪會好似魚旦咁O係個口到彈黎彈去架呢....!?
咁粒卵子會點著床?碌返去子宮到? 咁點避開胃酸呢?

下次講拖手拖超過48小時會有BB丫...
精子同卵子好似生倒刺咁，O係指甲邊邊到爆出黎丫.....
勁呀，10胞胎都有得生呀!

P.S.
係咪有一刻信左?? 你睇到邊到先笑?
真係.......得啖笑啦。
希望大家有個開開心心的週末! Happi Weekend!

信不信由你 I 之陪嫖

2010-04-08T12:22:00.001+08:00

OKAY，我決定買550D。鏡頭未決定。

有人話 N 機保值，我唔覺得呢個係重點，以保值為考慮因素，我會買金條。
打算本/下星期到香港購買，有沒有好人肯陪我去呀?

相識多年的男性朋友 R 分享了他陪其他朋友去嫖妓的經驗------重點係陪。
他自己本人只有看，沒有親身嘗試過。
女性角度，我不信。
朋友角度，我又信。
你呢?

嫖妓的男人，怎樣? 有必要扣分嗎?

復活節 @ 澳門

2010-04-07T16:27:00.000+08:00

EASTER好忙，有好多朋友黎左澳門，我選擇左招呼其中的2班朋友，因為我得一個人又而且真係冇咁多時間，朋友D﹑朋友A﹑朋友U……唔好意思。
EASTER期間，澳門好似俾香港人攻陷左咁，個個都手持地圖呀，澳門自助遊既書呀，一個一個咁排隊等食，係真係排長 ----------- 長 ------- 長龍，為左食一碗麵，閒閒地要企門口等45分鐘，都大把人排隊，『阿蘇效應』真係好勁。

我會推介六記。
真係好食，同埋... 童年回憶，主觀地加左100分喇已經.... 呵呵呵呵~~

真係好搞笑，都真係香港人先會咁:

攞左籌仔，可以行開少少等位嗎? 個個企o係門口，迫爆個門口先安樂.......

唔係先到先得﹑唔係鬥快舉手... 迫o係人地門口又或者步步緊貼個帶位....係咪會快D到你丫?

點解有D人係會企埋入去間餐廳入面，企埋去人地食客張臺隔離，望住人地食，睇人地食咩，睇人地幾時食完.......
咩野事呀究竟? 『不設企位』囉。

仲有，唔好乘機製造混亂啦:
『姓陳既，陳小姐5位，有冇?』
『我呀，我姓陳呀(男人)，我 7 位喎!』<-- 即係好明顯唔係你。
『有呀，5 位你俾我先啦，我姓王呀!』<--即係擺明打尖。
『我都係5位，幾時到我呀???』<-- 即係可唔可以唔好問埋呢D冇人答到既問題呀。
『冇呀，睇住佢岩岩走左喇。』<-- 即係呢.... 真係唔該哂你!!!

首先唔評論阿蘇介紹的食物有幾 SO GOOD，我想問一問排隊既人，點解唔用其他方法去好好享受下人生，過一個更優質的假期，靜靜的慢慢的，輕輕鬆鬆過下日晨呢? 平時都已經企得多﹑排得多﹑迫得多喇……放假又何必再係咁呢?

結果聽到好多香港人都怨聲載度，又話人地D野出得慢，又話手腳唔夠快…
我唔係想偏幫澳門，而係根本澳門的人﹑生活節奏﹑工作態度﹑文化習慣都同香港好唔一樣，點解要批評呢樣果樣?
去到邊食到邊，體驗一下，又或者踫踫運氣，憑自己發掘一下食店又有何不可呢!?
我覺得本住 ‘探險’精神，旅行先會有多d笑料，多d樂趣。

P.S. 米仔o係呢個easter好叻仔，識左個女朋友，仲已經去到拖手仔階段!! 佢阿媽我就咩都冇。

金沙牛扒 Steak @ Sands

2010-03-30T23:59:00.005+08:00

time flies.
i've moved to macao for 1.5 months already. i'm doing good n staying happi, as always. thank god.
Yet i will feel lonely n empty sometimes, especially in the middle of the nite.
i miss my family. i wanna see them every sundays tho they had already visited me twice.

one bad news.
i gained weight! 6 lbs! What the ...........!!!

good food everywhere, here in macao.
Even though i tried one bite only, still, i would say this is a very good steak!
Its FREE if you could finish it by ONLY YOU yourself.

60 oz quality steak @ Sands

6-inch-portuguese-egg-tart

Dear friends,

come visit me often.i miss you all.

綿羊仔40

2010-03-25T20:07:00.001+08:00

今日同新識的朋友 E 去食越南野，ok好食的，不過好大碗，好大碟，好飽。
不過... 都係好掛住三藩市哥d越南粉，唔知下次(仲有冇下次?)去食野係幾時呢.....?

真係好地道的澳門男人，用左架綿羊仔黎接我收工!
好彩係好好彩我著左褲，如果唔係，我係唔會上車囉!!!!!
開車無耐，我好醒咁講:『 WA，唔快囉，一D都唔驚囉!』

『小姐，而家行緊 40 囉。』

可惡的一蚊

2010-03-22T22:07:00.000+08:00

很可惡!! 可怒也!!
半夜 4:30 ，對手痕到醒左，開燈睇睇，痴鬼線，一對玉手多了八粒紅點!!
哥隻 PK 蚊，不得好死 ----- 一定飽死左!!!!
真係人離鄉賤，即係平時俾香港蚊咬，最多都係痕一痕，R一R就冇野。
今次呢隻馬交蚊，搞到我對手，又紅又痕又腫又痛，好鬼辛苦!
左手食指+右手的中指+右手的無名指的指節位，岩岩就係俾蚊咬中左!! 戒子都戴唔到囉!!
為左令到對手快D好返，(俾少少鼓勵佢地都要啦....) 咁我 LUNCH TIME 就去買左2隻新戒指~!
希望你地快 D 好返啦啦!

TO-BUY-LIST 加上:
...
放O係房哥D蚊水

落咩

2010-03-12T01:54:00.002+08:00

Ting-ting :『可能我會落咩咩...落葉歸根呢!』
朋友a:『落地生根呀! 落咩葉呀!!!』

半夜三更，2個女人傻傻地，笑到停唔到.......

買 canon 定 nikon 呀?

備忘

2010-03-11T00:30:00.000+08:00

今個星期六+星期日會返香港，好忙 :
-----------------買--------------------
買電芯+電筒+電腦+電話+電燈胆+電磁爐+香水+香精
-----------------食----------------------
食魚+食魚旦+食糖水+食日本野+食飯+食xxx
----------------做----------------------
賣口乖+嗲阿爸+冧阿媽+轉台去數碼通+交咭數
----------------去----------------------
去做SPA+去飲茶+去睇戲+去做哂以上呢D野去!!!

有冇野漏左呀??

豬夠未呀.....

2010-03-10T00:10:00.000+08:00

請問今日個大廚係咪同豬有仇:

燒鴨+梅菜豬肉+豬手+排骨+東瓜+白飯+豬肉碎粥+菜干煲豬爭
我只可以揀: 東瓜+白飯
放入口，好想對住個廚房大叫:係咪癲架!!!!!!!? 涷瓜涷飯咩事呀!!!!!!
一路食，一路擰頭，我係控制唔到我個頭，一路擰一路唉...
同事見到笑左:『你食下豬手啦，豬手好熱，出煙架!!! 』

頂頂頂頂頂頂，豬牛羊鴨鵝蛇狗，有咩好食丫，唔食呢 D 唔算偏食掛??

下癮上癮

2010-03-09T10:57:00.000+08:00

今朝 7 30起身，諗住去跑步，
個天好黑啦，
天氣又好涷啦，
個地又好濕啦，
個身又好軟啦，
個被竇又好舒服啦....
咁.... 跑步呢D野，又係會上癮，跑開唔跑周身痕，
唔跑開呢，又會下癮，好明顯我已經有d下癮傾向喇，嗯...咁啦，.............聽日先開始丫。請支持!

返到公司，即磨左一杯特濃 Espresso 黎飲，日日都一杯，有時晏晝 tea time 再 encore 多一杯。
tea lady 話我愈飲愈濃，叫我加一匙糖。我無加到。 =p
我唔知係咪對飲咖啡上左癮，不過聞到就好輕奮...
噢~或者唔係對飲咖啡上癮，而係聞咖啡聞上癮...? 咁咖啡濃得滯會唔會有害丫?
仲有呢....我成日都覺得咖啡應該係熱澀香的，加冰奶糖都唔好飲，最近有人叫我加檸試下，我就未試，唔知係咪正match 。

請伸出援手．．．２隻

2010-03-08T11:17:00.000+08:00

岩岩過左哥個 weekend 返左香港，又係落雨....
我拖住個巨形大喼，唔重，因為裡面只有一部患了末期癌症的手提電腦，好輕不過都好狼狽。

＠澳門
我部 notebook 入唔到 WINDOW，開機之後黑色，之後就有一句: Systerm not found
重新開機 + 輕輕拍打 + 劍指咒罵 + 葉問連環拳....... 都係: system not found
呢個死人機係咪鬼上身丫！？係咪要搵司徒法正先得呀！！！　ＬＧ　品牌正一Ｘ街！
有個報失中心就好啦．．．　我想去ＬＯＳＴ　＆　ＦＯＵＮＤ　到搵搵囉．．．
不嬲呢ｄ野係男朋友做開，而家男友位置懸空，無左個技術支援專員，都真係好怕屋企ｄ電子產品壞囉．．．
我都真係唔怕羞，同ｅｘ　講左一聲，叫佢伸出援手．．．　
點知．．．　『你買過部啦！』
男人呢．．．．　沒有一個好東西！！！

＠香港
返到屋企，同ｔａ媽子撒撒嬌，又『耶～』又『ｅｅｅｅ．．．．』叫佢買條魚蒸黎食下，佢最後都係應承左。
不過，ｔａ老爸就話：『ｗａ！肥左好多！！』我即刻衝左入房磅磅重喇．．．ｏｈ　ｍｙ　ｇｏｄ！！　肥左４磅！！！唔怪之得我塊面咁圓啦．．．ｔａ老爸都幾鬼好眼力！
澳門太多野食喇．．．！我又係太懶喇．．．．．！　ｓｈｉｔ，真係要ｋｅｅｐ下！
有無人可以伸出援手一隻，幫我搣搣脂呢．．．？

好Q憎!!!!

2010-03-04T23:54:00.000+08:00

最近有promotion，迫住每日要落中場行2個圈，嘩.........................人人都食煙!! 有咩咁好食丫!!?

一向唔打麻雀唔賭錢的我，一向鄙視哥d日賭夜賭的人。

仲有，我最憎人又煙又賭又嫖又粗口..............而家............ 日對夜對!!!! 好Q憎!!!!

晚上，無啦啦老虎機死哂，咁多層都一齊死，我當然死都唔落場啦，一定俾人鬧死!!
呵呵呵呵，你話你中左 1 蚊，1千萬定 jackpot 都冇所謂，只會得一個答案:『sorry，你要再玩過!』

病

2010-02-28T00:00:00.010+08:00

昨晚，隱隱作痛。
頭痛，作嘔，腸抽筋，痾左 8 次。

早上，痛到不行。
發燒，又作嘔，又痾 2 次，暈左。急性腸胃炎。

睇醫生，打埋針，抄多藥丸。
一出糧即破財。POOR ME!

三﹑四日內，只可食梳打餅。
不過，今日偷偷地去左燒灰爐西灣安記，偷偷地買左個辣魚包，又偷偷地放左入口。
之後..... 大肚腩內面果條腸不停抗議..........
晚上，放左工，收到電話，好開心好 surprise，朋友 C 過左黎探我，仲一行 5 人去左祥記，我又偷偷食左一小碗蝦子撈麵，又偷偷放左一塊魚皮入口。
20分鐘後，標冷汗，又肚痛..........

幾天前，我路過超市見到我的最愛珍珍薯圈出左新包裝，即刻買左，

我覺得個圈字真係好圈圈囉，哈哈。
而家成日都對住但係又唔可以食，
好慘呀............!!!

抄痛!!

2010-02-26T12:12:00.000+08:00

今日我遲到呀!! 足足6分鐘…會唔會過唔到probation呢?

再之後，因為太急趕啦，冇買早餐，又唔想去員工餐廳食，就決定咩都唔食算數。
日日如是，一杯黑咖啡，不過今日就轉左，飲左一杯抄香的 espresso。
3分鐘之後，抄快，個胃抄痛!!
唔知肚餓定係咩啦…咁我就食左本身帶黎準備 tea time 的生果，食哂: 半個橙 + 一個奇異果。
5分鐘之後，抄快囉都係，到我個肚抄痛，好似俾人一針一針吉入去咁 !!
一定要去洗手間啦呢D位，足足係2次囉!! 抄尷尬!!

直到而家都仲係胃痛… 想點丫…

仲有… 而家個肚打緊鼓，抄肚餓呀!!!!!

我的近況

2010-02-25T12:31:00.001+08:00

很多朋友都問了我很多有關新工作的問題，(但大部份追問的是如何打贏老虎，有什麼精明耍樂之法等等)
接著就是查問有關通過我的職能而得到的餐飲膳食住宿演唱會的優惠，(相信這個才是你們感興趣的!)
其實我只是博士云云手下中的一隻迷途小綿羊，能力有限，令你們失望了。

不過，如果你真的真的很想很想去搜刮一點點的免費住宿/免費自助餐/ 免費船票/直昇機來回票，我是有辦法幫你的….
不過再不過，我經常都說，因果必循環，世界沒有可能有免費的東西，你要付出的/犧牲的/失去一些東西…。

新居鎖匙已到手，不過我很抗拒，我就是不想動身住進去。
嗯….
一向都討厭獨居生活，我很怕悶，我很怕靜，我很怕黑

天氣抄涷

2010-02-19T14:24:00.000+08:00

開工幾日，都仲係ok好開心呀!
呢到好凍呀! 白痴的我無帶羽絨外套喇，又留左o係香港屋企呀... 好涷好涷! 香港的 6 度唔等於澳門的 6 度，何況今日仲要係得 5 度囉.....
香港人多車多樓多，人又行得急車有開得快，根本...唔會點feel到好好好好..好涷。不過，澳門呢到就唔同，真係可以 20 步之內都無人架，幾好呀，我好鐘意呢 d 生活環境!

今朝大概只有5度左右，5度的10鐘的路程已經足以令手腳冰! 又未訓醒又肚餓，仲要成日微微雨，真係好鬼痴線! 如果我唔係著住條西裙又高踭鞋呢，真係會大步大步咁跑返去! 哎，以前返機場，21閘跑去60幾閘都係咁跑，係完全無受傷無拗柴喎，而家唔得囉，驚傷驚PK驚毀容，心中恐懼大過天。

我好掛住香港一串串果 D 魚旦 + XXX呀!

P.S. 大年初五，飛 G 數目: 2
熱氣指數屬於普通。

年三十晚

2010-02-14T23:59:00.010+08:00

我向大家恭祝一句 : 恭喜發大財 !

新年到喇，我最最最鐘意就係呢個節日。今年對我黎講真係好特別，由年廿八起，我已經去左澳門喇過我嘅新生活喇。
新工作 o係賭場入面做嘅，仲要係我好想入嘅 marketing 部門，我條 TEAM 係專門做 event嘅。雖然返工只係返左工 2 日，不過已經有好多野要做要跟，因為新年各賭場都有好多好多 PROMOTION，大家一齊鬥快搶客.....派錢派獎!! ( ?? )

好多朋友見到我 FB 的 STATUS，先知道我搵到工同過澳門做野，個個都打電話/ sms 俾我，恭喜我搵到工啦，叮嚀我事事要小心啦，千萬唔好染上賭癮，一定一定要釣個何氏金龜.... 等等。不過，同一時間，我都收到好多朋友的微言:
『有冇搞錯呀? 年廿七先公告天下你年廿八過去開工做野，咁點同你 FAREWELL 呀!?!??!』
『又係咁!! 咩都唔講!! 幾時去 in 幾時簽 contract 又係無人知!!』
『要知道你 d 野，真係要日日打電話去搵你!!』
『你年廿九係咪會拍緊拖，年三十就會生左仔架 ? 有咩要講先得架!』

希望大家唔好再鬧我啦，你地都我知我唔鐘意將 D 唔肯定嘅野講出黎架啦......
如果 d 野唔肯定....又要人擔心，又要人同我一齊緊張，萬一衰左又要煩到人去安慰我，我最唔想俾麻煩朋友....
我未有拖拍呀，哈哈，不過我諗我都係會穩定先公開囉，到時sms你地丫!!

睇下澳門嘅花市丫:

我希望大家都可以開開心心咁過呢一年啦~~!!!

玩我呀？

2010-02-10T13:37:00.000+08:00

01 : 00 AM - 07 :00 AM
好認真咁寫左論文 6 個鐘，修改之後又修改，ｏｋ終於有ｄ野睇，諗住伸個懶腰就閂機去訓教喇，點知，忽然之間部腦黑哂，開返就上唔到網 +成個 FILE連個論文word檔都無埋。
所有辦法試哂，竟然係咩都搵唔到！！　究竟我頭先果６個鐘係咪發緊夢？？？
係咪即係叫我﹑想我﹑暗示我，唔洗寫﹑唔洗做﹑唔洗交？

而家都仲未上到網，只係靠好好彩咁估中樓下阿 C個 router 嘅 password ！！ｓｏｒｒｙ真係要借黎用下先！有機會我一定會還返！
哎呀。。。發生咩野事？　係 modem 壞定係 router 爛 ?　定係條 LAN 線斷左？
最衰最慘係以上全部都唔係。。。。。。
可能，我部 notebook 入面住左隻鬼。。。。。

今日我忟憎嘅情度係１０盞燈，想喊嘅 Level更加係爆哂燈。搵人得閒哄下我，我會攬實你！

朋友都受傷了

2010-02-09T16:51:00.001+08:00

都係寫返呢一日，其實呢日都發生左好多事。今日要去醫院，因為朋友 F 要去覆診睇報告。點知，同一時間，不過唔同醫院，原來好朋友 B 又係今日去覆診睇報告。由於我應承左朋友 F 在先，我會選擇陪佢，朋友 B 知道我為人，佢好明白，我感到安慰。

2010年 2月 1 日

和朋友 F 等候醫生接見其間，收到朋友 B 的來電，是報喜的。THANK GOD!
醫生說暫時沒有顯示因遺傳而失明的情況，不過，卻發現眼底神經線卻異常發漲，要繼續驗眼﹑覆診......下一次的覆診時間已預約好--50個月之後。 ( 痴鬼線的公立醫院! )
我們一邊笑一邊說，我真的真的很安心，整天都很擔心朋友 B 會如他爸爸和哥哥一樣失去視力，幸而，暫時情況樂觀。
不過我都已經想好了，要是她真的出事了，我會一直給她支持和照顧，譬如:
每天都替她畫好又黑又整齊的眼線----這是她最愛的。

同一時間，朋友 F 被召見，尊重私隱，我沒有跟隨入房。心中暗自祈求朋友 F 的傷勢不會太嚴重。一會，朋友 F 出來啦，木無表情，情況不是太好，得休息 25日才可做第 2 次的治療。
我 - 很 - 想 - 哭。
朋友 F 見到了，他笑，還反過來安慰我不要擔心﹑不要難過。白痴的我都知道，他一定比我更擔心更難過，我叫他不要笑，要喊便喊出來，他說他沒事。他馬上打電話，對方不是女朋友﹑不是家人﹑不是保險公司........而是上司和同事，報告自己的情況和請假，可想而知，他最擔心的是工作而不是自己的傷勢。

以為朋友 B 的好消息會繼續延續下去至我身邊每一位朋友，可是事與願違。
朋友 F 得知朋友 B 暫時情況OK，都表示安慰。不過，我想他內心一定很納悶，大家都是同一天覆診，不過，結果剛剛相反。
朋友 F 是男人，我想工作對男人來說必定是排名第一，現在至少要休息上 25 天，又預算 25 天後會再多來 25天，會是對他工作有什麼樣的影響呢? 又，獨自留在家中，加上行動不便，性格愛玩愛說愛笑就是不愛家的朋友 F ，現在一定悶得發慌了。

我有我的經歷，明白知道沒有工作的心情和生活是何等累人。
我不知道我應該 / 可以替他幫上什麼忙，只好多打電話給他﹑多去探望他﹑給他多點機會請我食飯喇，哈哈哈哈!!
放心好了，小心照顧自己啦，一定一定一定會好起來! 之後約你陪我踩單車呀!!

朋友 S，踢波( 被人 )踢爆個膝頭 ( 咁滯 )，一大片又黑又藍的瘀傷，我都好鬼擔心你。不過你有運動底又年青力壯，相信你會好快就 OK 哂喇。
我以後都會提醒你，落場前除左做熱身拉筋，唔該你換返套鐵甲威龍先出場丫!

送叫波衫俾你丫---- 梅菲明。唔洗多謝我!!!

沒有家庭溫暖

2010-02-07T15:11:00.000+08:00

整整一星期沒有更新網誌，一是懶，二是忙。這幾天真的沒有一天是靜靜地在家中 HEA，即整整沒有修甲﹑敷MASK﹑寫論文……. 七天!!! 我想盡量嘗試把這幾天的事一一補回，因為大多都是開心的。

2010年 2月 1 日

今日一早已打點好﹑準備好所有今天該完成的事，11時便邀請 ta 老爸﹑ta 媽子和姨婆去飲茶。頭上有紅色頭帶一條，身穿灰色背心和牛仔褲的我，準備開門啦。

ta 媽子勸導:『今晚會凍，帶件外套啦。』

我:『晚晚都係會涷過朝頭早架喇，你講左 20 幾年喇。』

ta 老爸:『而家興灰色咩 ?』

我:『唔知喎，我求其著…』

ta 老爸:『咁家下一定係興扣肉啦! ?』指住我對手臂。『阿媽咪，我都換返件菊花牌背心先!! 我又要潮下。。。』

ta 媽子:『不如你著婷婷果件通花吊帶啦，咁就最好睇!』

佢地又大笑左一分鐘。

我: 『好-----------喇-------------喎-------------你-------------地 !!!! 』

我的家，完全沒有家庭溫暖。=p

2010 年 1 月 31 日星期日

2010-02-01T23:08:00.001+08:00

衰人朋友嘈醒我 04:15 am - 07:00 am
早上 04:15 收到衰人朋友 SMS一個:『終於打完 16 圈喇，勁眼訓呀 !!!』
我睇完之後，眼光光到 7 點幾至訓得返 ......好鬼忟憎，我唔係一個『即刻訓得著嘅人』。
不過，算數啦，佢以為我未訓啫。
嗯...係咪訓教熄電話好 D 呢?

契仔 P 的禮物 11:00 am - 11:25 am
11 點起身，收到住在荃灣的朋友 W 的電話，話我契仔 P 有野送俾我，叫我落樓拎。
落到去，唔知點解我同朋友 W 一齊講化妝品講到雞啄唔斷 !
我忽然發現 : 『 11: 20 AM 呀!!』
朋友 W :『快D啦，又話 12:00 要出到九龍!!』
我一路轉身一路大叫:『 BYE BYE喇!!』
朋友 W: 『喂!!!~~~~~~~ 我黎係代我個仔想俾禮物你架!!!』
最後係無時間食早餐，就衝左出去九龍喇....... 成件事係好白痴，我連拆開黎睇下份禮物嘅時間都無 !!

一份臨時工 12:00 nn - 6:00 pm
去到九龍，2位男性朋友 S 和朋友 K，相約好替令一位男性朋友 P 打工，真係 HEA 工一份。
好搞笑，大家成日都見架喇.... 但係都可以圍埋一齊講旅行﹑講鬼故﹑講 FASHON﹑講食物﹑講工作﹑講小孩﹑講減肥，痴鬼線，阿 S，你可唔可以重多 10 磅?? 我接受唔到有男人係輕過我!!!!
呢日返工抄開心，有講有笑又一日。

farewell dinner 7:00 - 10:00 pm
朋友 ISB 要走了，大家一行１５﹑１６人，一齊去大牌檔食一餐啦。
所有野食都係朋友 B 點嘅，全部都係我最鐘意食嘅~ YEAH!
黃金蝦﹑炒蜆﹑炒蟹﹑蠔餅﹑魷魚﹑扇貝﹑象拔蚌..... 仲有煲仔飯!!! 仲有好多好多........
飽到真係....好飽!! 最後返左黎屋企都係要食消化餅。

打交 10:00pm - 12:00am/+
最後最後，我同 J 爺去左朋友 B 位於圍村內的新屋，沿途抄黑，朋友 B 都要拎電筒先睇到路呀！
我問 B：『咁黑，會唔會日日都好驚呀？』
J 爺：『有咩野要驚都唔夠你咁得人驚！』
我問B:『呢到會唔會有好多狗呀？』
J 爺：『有！你咪就係最大隻果隻狗囉！』
我：『咁你又行我後面！你都係跟尾狗！！』
J 爺：『你係老虎狗！』
我：『唔好嘈啦！』
都唔係同佢講野！！成日插咀！！！

朋友 B一邊行一邊叫我地唔好咁大聲，圍村人早訓教！點知個死人口水佬 J 爺死唔肯收口，係都要 KEEP 住寸我！
我：『係咪真係要我一野拍扁你啫！』
J 爺：『Come on!! 一野拍唔扁咁點先！』
我：『係咪唔信我會郁手呀！？？』
J 爺：『信信信，千其唔好！你手臂粗過我大腿！』
我：『你發育不良！』
J 爺：『你發育過度！』
我：『行開啦你！！！』

入到屋，朋友 B 都係再三叫我地唔好咁大聲。。。　之後佢開始介紹間屋嘅擺設／裝潢。。。。
跟住都唔知咩事（真係唔知講開Ｄ咩。），我同 J 爺唔知點解會打起上黎，原本係拎牆紙互篤肚腩﹑之後就喪扑頭﹑亂打一通。。。。。
朋友 B係完全停左口，都無我地咁好氣，坐正我地對面睇，等我地打餐死。。。
最後我同 J爺打到半訓半碌半坐o係梳化上面，牆紙一早唔知飛左去邊，都死要求其見野就立，佢立左支電蚊拍，我立左支唔知乜野膠條 ( shit! 立野唔夠佢快！)，又打過。。。
朋友 B終於開口：『喂！支蚊拍無安全網，會電親架！』

J爺停左手，我就乖機狠狠地再打多佢一野！
呵呵～　我贏左！

食物緣份遊戲

2010-01-30T23:49:00.000+08:00

好想食 xxx
如果有人突然請我食，我會好愛 kui 。

關心朋友

2010-01-29T01:21:00.001+08:00

B 說 (上午 12:55):
how r u ar
u got bf or job

-. ♡ +a +a ♡ .- 說 (上午 12:55):
仲咩個個都咁問.

B 說 (上午 12:55):
你要學發姣嘛
哈哈
咁好難令人唔聯想到咁

-. ♡ +a +a ♡ .- 說 (上午 12:56):
下....?

B 說 (上午 12:57):
係呀
你都唔答我

-. ♡ +a +a ♡ .- 說 (上午 12:57):
我只係俾人講我唔識發姣.

B 說 (上午 12:57):
咁唔識咪唔識

-. ♡ +a +a ♡ .- 說 (上午 12:57):
咁就想學下.

B說 (上午 12:57):
喂
你都係唔答我囉

-. ♡ +a +a ♡ .- 說 (上午 12:57):
咩呀

B 說 (上午 12:57):
我關心緊你呀仆街
頂
好似對空氣講咁

-. ♡ +a +a ♡ .- 說 (上午 12:58):
我關心緊你呀仆街 <--- 抄關心囉....!!!!

B係一個男性朋友，慢熱怕羞，但係人品 OK，內心溫柔，好人黎架。
不嬲 SMS / MSN 都好主動關心我，係真心位，唔係單單攞人地 UPDATE 黎做其他聚會話題果種。
今日唔知佢咩事囉，真係唔知點解要咁樣對我囉........
我有乜可能唔努力 D 學習發姣做返個女人呢?
再唔努力 DD，就真係無人會對我斯文/溫柔囉~!!!

學習

2010-01-28T14:09:00.000+08:00

努力學習發姣中...

朋友話未見過我發姣，我反問自己，都真係唔知自己有冇姣過。
TA: 『應該有，對住鐘意嘅人，一定會嗲 D。』
朋友: 『頂你，你平時太強悍，嗲 D 都未得，完成掂唔到中位線。再努力 D !』
TA:『車，姣呢 D 天生架喎...』
朋友:『唔係，係要做出黎架，冇男人唔鐘意姣女嗲精，你要增加機會率，就要識得姣。』
TA:『妖，盡量啦。』
朋友:『女人唔識姣就好似未生過仔咁，就唔係真女人喇。』

男性朋友教路:
1. deep v        ( 我成日著，不過可能唔夠deep )
2.高音講野
3.挨身挨世     (我都出名冇腰骨 )
4.望男人時要朦起對眼 (我經常啦.... 散光呀麻 )
5.厚咀     ( 我都算係喎 )
6.耶ee啦囉啫，尾音要多要長。 ( 我成日俾人話我講野尾音長啦已經 )
7.成日含笑含笑樣 ( 我成日爆笑大笑，含就真係無.... )
8.扮路痴
9.扮無知
10.再主動DD

耶 ~~~
我又要做個真女人~!

我想

2010-01-27T23:51:00.000+08:00

我想:

到廣州買書，因為真係要真真正正把論文修改一下，死線迫在眉睫。
不過，
年近歲晚，治安會不會很差 ?　已經很倒霉的我會否被劫財？

到蒙古　／　新疆去，因為想去看草，美海／美雪我都看過，欠美草。
不過，
無人陪我去，朋友們說那些悶地方不合適二十幾歲去。

同埋，
想打開房門，即刻有得飲紅豆冰。

BLOG 友

2010-01-27T00:09:00.000+08:00

死人大力:
好後悔俾你 ADD 左我 MSN。
痴鬼線，你一俾 MSG 我即 HANG 機!! 5分鐘 HANG 足 5次!!
唔該你山哂 D 咸網先同我 MSN，唔該 ! =P
一係簡單DD，你是但求奇買個部電腦俾我專係 FOR 同你 MSN 啦 !
好驚，好好彩我今日做懶鬼啫，如果我今晚開始左寫論文，HANG 成咁，我一定喊死左。
請放過我。

浪子M:
雖然你對強姦 / 4仔有興趣有研究，不過ADD左你咁耐，SO FAR 都未 HANG 過機。
我諗你有節制過大力喇......
多謝你尊重我。

13elle:
Sorry，根本follow唔到你講咩，被迫要你講多左咁多次，你而家知咩事啦............
原諒我。

地下鐵

2010-01-26T08:17:00.002+08:00

我唔太鍾意坐地下鐵。
好好好唔鐘意被困﹑被迫的感覺。尤其是繁忙時間，對口對面又迫黎迫去，好悶好熱好核突好忟憎。
唔好推我﹑撞我﹑迫我，我係真係會發火嘅。

男男女女咩事呢? 用手袋呀﹑公事包呀﹑背囊呀...... 一個二個好似十字軍軍人咁，拎個袋黎做盾牌，放o係心口前面就無敵咁款，死頂爛頂，頂到袋都爛!!!! 講句『唔該借過。』可唔可以??
唔係好明點解d人要衝門呀，撞人呀，推人入車呀，等多一分鐘，下一架車先上得唔得? 遲一架車係唔係會令你家散人亡啫 !!

如果唔太迫，搭下地鐵幾好架。
幾分鐘約會-陳百強
地下鐵碰著他...

地下鐵邂逅他...

車廂中的暢談最受用...

地下鐵裡面每日相見......

不過，浪漫同現實真係可以差好遠，幾分鐘的約會，我好希望他朝有日可以在我身上上演一次。

時間: 上星期
地點: 銅鑼灣去北角
主角: 一位年近 60 歲的大叔
道具: i-phone

大叔: 『叫你買架啦! 果隻升梗!! 而家賺成70萬!』
大叔: 『我冇買喎! 70萬要黎有咩用! 買樓好搵 d 啦梗係! 你唔好士刁拔!』
大叔: 『你睇鳥士谷! 學下野，唔好咁奶 E !』
我其實唔明佢講緊咩...不過佢愈來愈大聲.....
大叔仲問我: 『小姐呀，北角有冇得壓化療 ?』
我: 『下 ?』
大叔: 『壓化療呀知唔知 ?』
我: 『我唔熟北角，唔知邊到有醫院喎...你出站問下人呀!』
大叔:『唔係去醫院呀!!! 我想壓化療....』

呢個時候，拎左一樣野出黎....

我笑到彎哂腰: 『大叔呀!!! 唔好講英文啦你!!!!』
大叔:『哈哈哈哈，活到老，學到老呀!!』

壓化療 = ADD VALUE = 增值

今晚，我想哭。

2010-01-25T22:38:00.000+08:00

最近比較煩﹑比較煩.............
身體比較差﹑面色有點青白﹑手腳容易變得冰冷。

A 或 B? 去或留? 拒絕還是接受?
要想要分析要取捨，我懂得我知道。
但我沒有膽量肯定我的答案，更未能把它說出口，踏出第一步。

可能，我怕了。我怕我輸不起。

*********************************************************************************

吃過晚飯，決定把房間打掃一下。

床頭的架子上，放有很多東西 :
一起拍下的照片﹑
一起看過的電影的票尾﹑
一起到新餐廳試菜後我悄悄據為己有的那塊杯墊﹑
你(們)送到我的禮物﹑
寫過給我的信件/便條﹑
一起到大陸旅行的火車票﹑
你給我玩的魔術小玩意﹑
你給我的情信﹑
已吃完的GODIVA朱古力盒子，是你為哄我笑，而假裝上洗手間，俏俏溜去買的﹑
你為表誠心悔改而寫的道歉信﹑
你說過永不重犯﹑給我畫押打手指模的悔過書﹑
還有 2 本我寧死也不敢打開的 2008 + 2009年記事本﹑
............
............
............

花了大概一個小時，把所有東西都看了一遍，碰了一下。
最後並未能騰出額外的位置來，不太知道這個多小時做了什麼，大概只是把東西由東搬到西。

*********************************************************************************

回到過去，我想笑，但是笑不起來 ;
感慨從前，我想哭，但是哭不出來。

不要擔心我，我還很好。

一齊長大的朋友

2010-01-21T23:37:00.001+08:00

和男性相處就是好，大家想相約見面呀﹑吃飯呀﹑飲酒呀......什麼的，只要打一通電話，或兩三個電郵，就可以完成所有約會的地方和時間。

雖然已約好，但我只記得 7:00 pm @ 旺角地鐵站，哪個出口呢??
我------------不----------知-----------------道。
又，我沒有帶手提電話，沒有人可以找到我。
再又，我又忘記他們的電話號碼，找不到他們。
惟有隨心啦，旺角地鐵站內，我一邊隨人流 ( 被推 ) 行 ........... 剎那間，見到朋友 A 喇! 真的有緣千里能相會!!!

2 位男性朋友: 朋友 F + 朋友 A 已久沒見喇，其中一個已沒有見面大概一年喇，他和我SAY HI 後，就目不轉睛地看著我，看得我發熱又發紅，面額如掛上兩粒車厘子一樣可愛........
我咬一下唇，問 : 『仲咩呀 ? 我好靚呀 ??? 』
朋友 F : 『係..................呀, 係....................呀。睇得出..........』
朋友 A :『屌，你兩個做咩 X 野呀!!!!!!!!!!!!!!! 』
之後大家一齊又冇啦啦笑起上o黎。
我---依然唔知醜，迫人讚我靚。
朋友F---依然係怕羞仔，慢熱但係OK好玩。
朋友A---依然都係唔講粗口會訓唔著。

好友相約見面，或恰巧在街上踫到，你們又會是有什麼樣的開場白呢??

愛吃的朋友

2010-01-20T15:21:00.003+08:00

譚仔雲南米線 - 雞翼

有一次，下雨天，橫風橫雨，朋友 R 很愛吃米線，他和我硬著頭皮跑了一條街，風吹得很勁，我是真的第一次感受到，風是真的有能力把我吹向前/後/歪的....

愛吃的人就是如此，除非心中沒有食念，否則，如一想起什麼什麼想吃的，千里迢迢﹑攀山涉水﹑爆破山洞﹑又或飽得連十二指腸已漲至爆肚而出，都要硬塞那串麻辣魚旦入胃裡面去。

最後，衝入一個網上得了很多好評的一間著名米線店 -- 譚仔雲南米線。

嗯... 我點了中辣，都不是很辣啦，不過真的很熱啦，OK好食喇，但實在太大碗，米線好像吃不完似的。

我奮鬥了良久，真的吃不下去，推給朋友 R 替我 KO 它，( 請注意，邀請我陪吃飯的你們，請勿預先打底.......) 而我就再多點了一份雞翼，賣相十分恐怖!!!! ( 這是我最怕的事物之一，有機會再說明之。)不過，我覺得十分好吃。

旅行

2010-01-19T23:59:00.000+08:00

前晚有一位朋友打電話給我，
而昨晚又共有3位朋友打電話給我，
三更半夜，無意之間又給我發現有人明天凌晨就會上機，
他們一個一個的告訴我他們將會去旅行，問我想要什麼手信。

其實，上星期已有4位朋友已出發了，他們上機前都在登機閘口打電話給我，叫我千萬要開心呀，努力搵工呀等等，最後還問我要什麼特別的手信。

好感動，我不知道他們為什麼會刻意打電話問我要什麼，是不是看我像鄉下妹，一定一生人都走不出香港新界??
腦海浮出我成了又醜又乾的稻草人，在香港新界西的一片綠油油的草地上，站著站著，直到永遠。

我愛你們。
其實並不需要給我買些什麼喇，是旦求其無所謂啦，又靚又正又好又罕有就得啦~
4+1+3+1 = 9
哈哈~ 我將會有9份手信。
哈哈，認真的喇，我珍惜的是你們，不是那些小禮物喇。
Safe Trip!

P.S. 我有一年無去過旅行啦...好想去去去去去..... 去邊到好???

筆婷寫

我的工作

給我的好朋友

要求

開工大吉

謊話情話

淑女生病

Romantic lonely day

幸福的初三初四

兔年大吉

昨天今天

年尾流流

演唱會

父母之命

我也不想這麼樣

頂

給昨天生日的你

除夕大倒數

小心留意

冬至 X'mas 2010

生活無驚喜

吞淚

愛情.... 是這樣的嗎?

新好舊好 ?

習慣失戀

食豪D啦！

愛情不請自來

未雨綢繆

我執著。我等你。

愛情在翻天覆地一瞬間誕生

『恭喜你，成功通過了試用期。』

抄病

go to sleep!

苦沖開了便淡

一星期內的五個男人

背叛

當彼此間沒有愛

『等等等...等!!』『小姐俾反治!』

如果可以看煙花

好的壞的

拜拜

不要哭

好運返黎啦

可不可以不要再在我心情不好的時侯跳

三更半夜去呢到果到

一個特別的晚上

7 月中發生的幾件事

BALL

又想睇戲又想睇波

世界盃

睇波呀! 又估中呀!

又黎.............

變

傷

多謝你你你你你既支持，感動。我知，我要放低。

然後我有我生活，然後你再愛別人。

傷得很重卻未曾絕氣。

Damn it, i am the loser.

2010 年的上半部份

IQ 博士 @ 澳門

近況良好

買

媽媽妖我

蛋糕

忽然之間

默哀

賭場 之 升降機內

大病一場

發燒

TGIF

假人

祝福相機

你是誰?

信不信由你 II 之接吻可懷孕

信不信由你 I 之陪嫖

復活節 @ 澳門

金沙牛扒 Steak @ Sands

綿羊仔40

可惡的一蚊

落咩

賭場　之升降機內

下癮上癮

2010 年 1 月 31 日星期日