多謝男朋友仔喇。
佢咩都唔識，又知道我想要一部有Manual功能的相機好耐，就想俾個SURPRISE我。
佢唔俾我知，靜雞雞問下呢個問下果個，睇下邊部有多FUNCTION又岩初學者用，又去百記同人搶貨，(因為呢個星期得返最後一部)，否則，要等多一星期先返貨。
但係................天網恢恢!
佢原本同我講，放工後，佢會去旺角信和睇GAME﹑買野﹑Hea 行一陣....
點知，過左一陣，我諗住打俾佢睇下佢買左咩啦，佢無啦啦鬼拍後尾枕同我講 :『我仲ｏ係百記睇緊！』
嘩嘩嘩！信和－－－－－－－－＞百記 ！！！
在我黎講，同我講大話係要斬頭嘅！
唔會等秋後處決，正常程序係立即十大酷刑﹑斬首示眾﹑再進行七七四十九日嘅鞭屍！
條友仔之後又話有苦衷﹑又話想俾個surprise我﹑又話冇心呃我呢樣果樣。。。。
我嘅反應係審犯﹑批鬥﹑勁忟﹑怒叫﹑喪鬧﹑分手。。。
第２日，買哂酷刑工具﹑菜刀﹑皮鞭搵佢講數，到左餐廳，棟起隻腳惡屎能登啤Ｑ住佢，點知。。。。
佢衰衰咁拎部Ｇ１０出黎送俾我！！
我即刻將Ｄ刀呀鞭呀塞入櫈底，雙腳平放緊合再４５度向右傾斜，貼上長長的假眼睫毛，微微低頭再回望佢一眼：
『噢，送俾我架？點解嘅？多謝你呀！』
佢再慢慢解解釋果日佢點解呃我。。。。。我係喊左出黎！（我從未為任何一份禮物喊過）
好感動，佢知我想要咩，又知我自己唔會買，見我呢排心情不佳，又乖乖做好paper，就俾個surprise我。
我睇得出佢用心良苦，同埋真係好似好錫我。（係咪？）
最後決定寬恕佢，只係執雞左一下：『點都好，唔可以呃我！』
好，要學好影相，要影到有我的風格 --- TA風!
第一次出去影相影咩好呢?
